Тўйхат ўрнида. Янгиликка интилиб
2024-09-25 12:10:00 / Янгиликлар
Бахтни ҳар бир инсон ўзича тушунади. Бинобарин, унинг формуласини ҳам ўзи яратади. Бахтни юрт равнақи йўлида хизмат қилиш, ҳар бир кунни хайрли аъмоллар билан ўтказишни ҳақиқий бахт деб билган инсонлардан бири Агзам Раҳимовдир.
Агзам Раҳимов 1959 йил 23 сентябрда Тошкент шаҳ рида туғилган. Мактабни тугатгандан сўнг бир муддат В. Чкалов номидаги Тошкент Авиация ишлаб чиқариш бирлашмаси объектларини ёнғиндан сақловчи 1-отрядининг ўт ўчирувчиси лавозимида хизмат қилади.
Ҳарбий хизматдан қайтгач, Тошкент шаҳар ИИБ ЁСБ тизимида ишлайди. 1989 йилда собиқ иттифоқ ИИВ Ёнғин-техник олий мактаби Тошкент факультетининг кундузги бўлимини тугатиб, хизматни ИИВ ЁХБда давом эттиради.
У хизмат фаолияти давомида кўплаб устозларидан машаққатли касб сирларини ўрганди. Ўзи билан бирга бошқармада хизмат қилаётган ҳамкасблари М. Иброҳимов, А. Қўлдошев, Т. Азимов, В. Макаров, Ю. Турдиев, М. Мирфайзиев, Б. Каримов, А. Исмоилов ва бошқа зобитлар билан елкама-елка туриб ёнғинларга йўл қўймасликка ва содир бўлганларини кам талофат билан бартараф этишда ўз ҳиссасини қўшди.
1997 йил ўзи хизмат қилаётган бўлимга раҳбар этиб тайинлангандан сўнг ёнғин ўчириш техникаси ва алоқа воситаларидан фойдаланиш, уларга ўз вақтида техник хизмат кўрсатиш бўйича МДҲ ва хорижий давлатлардаги янгиликлар ва уларни бизнинг шароит ва талабларга мослаган ҳолда ҳаётга татбиқ этиш, бино ва иншоотларни капитал таъмирдан чиқариш масалалари билан шуғулланди, илғор тажрибаларни республика миқёсида татбиқ этишга ҳаракат қилди. Бундан ташқари, ҳар икки йилда бир маротаба ўт ўчириш автомобиллари ҳайдовчилари ўртасида ўтказиладиган “Ўт ўчириш автомобилининг энг яхши ҳайдовчиси” номидаги республика мусобақасини ўтказилишини қайта йўлга қўйди ҳамда бир қанча меъёрий ҳужжатларни қайта ишлаб чиқишда бош-қош бўлди.
Ички ишлар органларида салкам 30 йил хизмат қилиб, подполковник унвонида пенсияга чиққан лавҳамиз қаҳрамони хизмат фаолияти давомида кўплаб шогирдларни тарбиялади. У. Авазбеков, Б. Адилов, Б. Алибеков, Ф. Турдиев, Б. Наврузов, Ф. Дадабоев ва бошқа шогирдлари ҳозирги кунда нафақада бўлса ҳам, республикамиз халқ хўжалигининг турли жабҳаларида ёнғин хавфсизлигини таъминлаш бўйича меҳнат қилишмоқда.
Агзам 2006 йил июнь ойида Ўзбекистон-Канада қўшма корхонасига қарашли бўлган “Қурилиш технологиялари” номли ташкилотда ёнғин хавфсизлиги муҳандиси лавозимида, 2007 йил октябрь ойидан эса “ABU SAXIY савдо маркази” МЧЖга ёнғин хавфсизлиги инспектори лавозимига ишга таклиф қилинди. Уч ойдан сўнг жамиятда малакали ёш, истеъфога чиққан ходимлар билан жамланган Ёнғин хавфсизлиги хизмати ташкил этилди ва бу янгидан тузилган хизматга 12 йил раҳбарлик қилди.
2019 йил сентябрь ойидан бошлаб то шу кунгача Ўзбекистон Республикаси “Tashkent City” мажмуасига кирувчи “Халқаро Конгресс Маркази” биносига хизмат кўрсатувчи “SKY EVENTS” МЧЖда меҳнат қилиб келмоқда.
Турмуш ўртоғи Дилфузахон билан икки нафар қиз ва бир ўғилни вояга етказган фахриймиз ҳозирги кунда 10 нафар набиранинг суюкли бобоси ва бувиси бўлиб бахтли умр кечиришмоқда.
Шу кунларда ўзининг 65 ёшини қаршилаётган Агзам Раҳимовнинг юрт равнақи йўлидаги фидойиликлари, хайрли аъмоллари бардавом бўлишини тилаб қоламиз.
Қодиржон Жўраев, истеъфодаги подполковник. “Постда”