1 октябрь — Ўқитувчи ва мураббийлар куни. Масъулиятни ҳис этиб
2024-09-24 08:15:00 / Янгиликлар
ИИВ Транспортда ва туризм объектларида хавфсизликни таъминлаш департаменти “Uzbekistan UzAuto Motors АЖ” юкларини кузатиш бўйича “Асака” бекатидаги 1-отряди шахсий таркиби автомобиль заводида ишлаб чиқарилган автомобиллар ва улар учун эҳтиёт қисмлар каби юкларни кузатиб бориш ва бутлигини сақлашдек масъулиятли вазифаларни бажаради.
- Нарядлар техника юкланган эшелонларни кузатиб боришади, — дейди гуруҳ командири, катта сержант Азизбек Юлбарсов. — Йўлда ходимлар қимматбаҳо юкларни эҳтиёт қилиб, муҳрлар бутлигини назорат қилишади, қўриқланаётган объектга бегона шахсларнинг киришига йўл қўймаслик учун профилактик чораларни кўришади.
Таъкидлаш жоизки, бўлинманинг бутун шахсий таркиби ноодатий вазиятларда ҳаракатга киришиш кўникмаларига эга, ходимлар қўл жанги усулларини яхши билишади ва махсус воситалардан мукаммал фойдалана олади. Улар исталган пайтда бириктирилган объектга уюштирилган босқин ёки яширинча киришни қайтаришга тайёр.
Шахсий таркибнинг асосий вазифаси — кузатиб бориш йўналишида нохуш ҳолатларнинг олдини олиш ва юк дахлсизлигини таъминлашдан иборат.
Йўналиш бўйлаб кузатиш нарядлари бўлинма навбатчи қисми билан доимий алоқада бўлиб туради. Кутилмаган ҳолатлар юзага келганда, дарҳол навбатчилик қисмига хабар беришади.
Ходимлар самарали хизмат қилиши учун зарур шароитлар яратилган. Маънавият ва маърифат машғулотлари мунтазам ўтказилиб, шахсий таркиб хизматдан бўш вақтида жисмоний тарбия ва спорт билан шуғулланиш имкониятига эга.
Отрядда “устоз-шогирд” анъанаси кенг йўлга қўйилган. Ёшлар биргаликдаги хизмат жараёнида кўникма ва тажрибалари билан ўртоқлашадиган ходимларга бириктирилади.
Борис КЛEЙМАН, ўз мухбиримиз.
Андижон вилояти.
Суратда: гуруҳ командири, катта сержант Азизбек Юлбарсов ва сафдор Эргашали Юнусов.