Репортаж. Бурчга садоқат беиз кетмас
2024-09-12 20:00:00 / Янгиликлар
Ўзбекистон Республикаси Ички ишлар вазирлиги Маданият саройида мустақиллигимизнинг 33 йиллиги муносабати билан тизимда фидокорона хизмат қилаётган бир гуруҳ ходимларга давлатимизнинг юксак мукофотларини тантанали равишда топшириш маросими бўлиб ўтди.
Тадбирни Ички ишлар вазири, генерал-лейтенант Пўлат Бобожонов очиб, тинчлик-осойишталикни таъминлашда ички ишлар органлари ходимлари томонидан кўрсатилаётган фидойилик давлатимиз раҳбари томонидан ҳамиша эъзозланишини таъкидлади.
Шундан сўнг, қонун устуворлигини таъминлаш, жамоат тартибини мустаҳкамлаш борасидаги шарафли бурчини бажариш чоғида мардлик, жасорат ва фидойилик кўрсатгани, соҳада юқори малакали кадрларни тайёрлаш, ёш авлодни она Ватанга муҳаббат ва садоқат руҳида тарбиялаш йўлидаги кўп йиллик самарали меҳнати ҳамда ижтимоий ҳаётдаги фаол иштироки учун бир гуруҳ Ички ишлар органлари ходимларига давлат мукофотлари, шунингдек, идоравий кўкрак нишонлари, эсдалик қўл соатлари, фахрий ёрлиқлар, махсус унвонлар, қимматбаҳо совғалар тантанали топширилди.
Бундан ташқари, юксак эътирофга сазовор бўлган фидойи ходимлар сўзга чиқиб, Юртбошимиз томонидан билдирилган ишонч уларга янада масъулият юклашини ҳамда халқимиз осойишталиги йўлида доимо камарбаста эканлигини билдиришди.
Сўз мукофотланганларга
Муродилла Аликариев – Тошкент шаҳар Ички ишлар бош бошқармаси бошлиғининг жамоат тартибини сақлаш бўйича ўринбосари, полковник, «Мардлик» ордени соҳиби: – Тинч юртга байрам ва тантаналар ярашади. Ажиб шукроналик ва юртга дахлдорлик туйғуларини ўзида акс эттирган бу йилги ҳурлик шодиёналари «Бир бўлсак – ягона халқмиз, бирлашсак – Ватанмиз!» шиори остида қарши олинганлигида ҳам рамзий маъно мужассам.
Албатта, берилган бундай юксак эътибор ва ғамхўрлик ҳар бир ходимга туну кун ўз устида ишлаш, жамоат хавфсизлигини таъминлаш учун барча куч-воситаларни сафарбар этиш мажбуриятини юклайди. Камтарона меҳнатимиз юқори баҳоланганидан бахтиёрман. Бундан кейин ҳам бўшашмаймиз!
Элдор Гулямов – ИИВ Транспорт ва туризм объектларида хавфсизликни таъминлаш департаменти батальон командири, подполковник, «Содиқ хизматлари учун» медали соҳиби: – Ички ишлар органларига қабул қилинганимга 30 йилдан ошибди. Шунча йиллик хизматимизга берилган бу катта эътибор учун, аввало, муҳтарам
Президентимизга, вазирлик раҳбариятига ҳамда мен билан елкама-елка фаолият олиб бораётган ҳамкасбларимга миннатдорлик изҳор этаман. Бу янгилик нафақат оила аъзоларимни, яқинларимни, балки департаментдаги барчани бирдек хурсанд қилди. Ҳаммага мен каби эътироф ва эътиборда бўлиш насиб қилсин.
Ғолиб Каримов – Жиззах вилояти Шароф Рашидов тумани ИИБ профилактика катта инспектори, капитан, «Шуҳрат» медали соҳиби: – Мукофотланганимни эшитган кўпчилик мени табриклашди.
Айниқса, ота-онам мен билан фахрланишларини айтишганида, касбимни тўғри танлаганимга яна бир бор амин бўлдим. Мен хизмат фаолиятимни «Раваллиқ» маҳалласида олиб бораман. 7800 нафардан ортиқ аҳоли истиқомат қиладиган ушбу ҳудуд ўтган йили қизил тоифада эди.
Қилинган изчил меҳнатлар самараси ўлароқ бу йил яшил тоифага ўтишига эришдик. Йил бошидан ҳозиргача биронта жиноят содир этилмади. Маҳалла еттилиги билан самарали фаолиятни йўлга қўйганмиз. Ушбу юксак мукофотга фақат аъло натижаларимиз орқали лаббай деб жавоб беришимиз керак деб ўйлайман!
©️ «Postda» газетаси, Аброр Поёнов ва Абу Кенжаев.