Юксак мукофот соҳиблари. Ишончга муносиб жавоб
2024-09-12 07:45:00 / Янгиликлар
Тошкент вилояти ИИББ Тезкор вазифаларни бажарувчи сафарбар отряди командирининг жанговар тайёргарлик бўйича ўринбосари, майор Жамолиддин Зикиров йигирма икки йиллик фаолияти давомида фидойи хизматлари билан раҳбарият ишончини қозониб келаётган осойишталик посбонларидан бири. Шу боисдан у истиқлолимизнинг 33 йиллик шодиёнаси арафасида «Жасорат» медали билан тақдирланди.
- Юрт корига ярайдиган фарзандни тарбиялаб вояга етказганимиздан доим фахрланиб келганмиз, — дейди унинг отаси Тоҳиржон ака. — Ўғлимизнинг юксак мукофотга лойиқ топилгани эса бизни янада хушнуд этди.
Қўл остидаги шахсий таркибнинг жисмоний ва жанговар тайёргарлик машғулотларини бекаму кўст олиб бораётган лавҳамиз қаҳрамони, махсус хизматлар ўртасида бўлиб ўтадиган «Алвон берет» ва кўпкураш мусобақалари ҳамда мамлакатимиз ва дунё миқёсида ўтказиладиган турли спорт тадбирларига ҳам пухта тайёргарлик кўришига муносиб ҳисса қўшаётир.
Тошкент туманида дунёга келган Жамолиддин болалигидан спортнинг дзюдо тури билан мунтазам шуғулланиб, юртимиз ёшлари ўртасида ташкил этилган кўплаб халқаро турнирларда кетма-кет шоҳсупанинг юқори поғоналаридан жой олди. Ҳозирда ҳам самбо бўйича ана шундай муваффақиятларга эришиб келаётир.
Мамлакатимиз ҳуқуқни муҳофаза қилувчи органлари ўртасида ўтказилган беллашувларда ўқ отиш бўйича 2 карра ғолибликни қўлга киритган Ж. Зикиров Марказий Осиё давлатлари ўртасида Қозоғистонда бўлиб ўтган мусобақада ҳам «Макаров» пистолетидан ўқ отиш баҳсларида тенгсиз деб топилди.
- Бу муваффақиятларга эришишимда устоз ва мураббийларимнинг ўрни бениҳоя каттадир, — дейди майор Ж. Зикиров. — Мукофот соҳиби бўлганим зиммамга янада масъулият юклайди. Уни шараф билан адо этиш давлатимиз ва ИИВ раҳбарияти томонидан билдирилган ишончни оқлашга муносиб жавоб бўлади, деб ўйлайман.
Ж. Зикиров турмуш ўртоғи Назирахон билан икки ўғил ва бир қизни тарбиялаб вояга етказмоқда. Ўғилларининг ҳар иккиси ҳам келажакда отаси каби эл-юрт тинчлигининг муносиб посбонлари бўлиш учун мактабдаги фанларни пухта ўзлаштириб, спорт билан мунтазам шуғулланмоқда.
Михли САФАРОВ, ўз мухбиримиз.