Фидойи ҳамкасбларимиз. Ўрнак олса арзийди
2024-09-09 17:00:00 / Янгиликлар
Навоий вилояти ички ишлар органларида касбини севиб, ардоқлаб, зиммасидаги вазифаларни сидқидилдан бажараётган ходимлар талайгина. Улардан ҳамкасблари ҳар жиҳатдан ўрнак олса арзийди. Қуйида сизларни ана шундай интилувчан ходимлардан айримлари билан таништирамиз.
Кармана тумани ИИБ ҳузуридаги Тергов бўлинмаси терговчиси, капитан Гулшода Ҳамраева ички ишлар органларидаги қарийб 10 йиллик хизмат фаолияти давомида кўплаб жиноятларни очишга муносиб ҳисса қўшиб келяпти. Табиатан хушчақчақ, киришимли лавҳамиз қаҳрамони хизматда тартиб-интизомни, расмий муносабатларда жиддийликни хуш кўради. Унинг турмуш ўртоғи Жамшид Ҳамраев адлия соҳасида хизмат қилгани боис, ўзаро ҳуқуқий билимлар алмашинуви, мақсадлар муштараклиги ҳар иккисининг ҳам муваффақиятларига замин бўлмоқда.
Нурота тумани ИИБ ЖХХ ҲПБ профилактика инспектори, капитан Бобур Эсанов ўз касбидан қувват оладиган, одамларнинг розилиги йўлида тиним билмайдиган фидойи ходимлардан. У туманнинг 3020 нафар аҳоли истиқомат қиладиган Ғафур Ғулом номли маҳалласи тинчлик-осойишталигини таъминлаш учун масъул. Лавҳамиз қаҳрамони мунтазам равишда олиб бораётган тарғибот-ташвиқот тадбирлари натижасида жорий йилда хизмат ҳудудида бирорта ҳам жиноят содир этилишига йўл қўйилмади.
У жиноят содир этишга мойил, спиртли ичимликка ружу қўйган ҳамда жазони ижро этиш муассасасидан қайтган шахсларнинг ҳар бири билан алоҳида тушунтириш ишлари олиб боради. Уларни ишга жойлаштириш, касб-ҳунарга ўқитиш чораларини кўряпти. Маҳалла еттилигининг бошқа аъзолари билан ҳамкорликда аҳолининг турли муаммоларини ҳал этишга муваффақ бўлишяпти.
Йўл ҳаракати хавфсизлиги хизмати Ахборот хизмати кичик мутахассиси, сафдор Сабина Ходжаева ҳаракат иштирокчиларининг маданиятини ошириш мақсадида тинимсиз изланади. Шунингдек, ижтимоий тармоқлар орқали соҳада рўй бераётган янгиликлар, расмий хабарлар, қоидаларга амал қилишни тарғиб қилувчи кўплаб лавҳалар, ижтимоий роликлар тайёрлаб, омма эътиборига ҳавола этади.
Икки йилдан буён Навоий вилояти ИИБ ЖХХ ЙҲХБнинг муаллифлик дастури бўлган «Авторакурс» лойиҳасининг эфирга узатилишида муносиб ҳисса қўшиб келяпти. У ҳозирда пиёдалар учун йўл ҳаракати қоидаларининг медиа услубидаги ўқув қўлланмаси устида ишламоқда. Мустақиллик билан тенгдош қаҳрамонимизнинг келажакдаги орзу-мақсадлари бисёр.
Ҳар бир соҳанинг ўзига хос машаққати бор. Ана шундай қийинчиликларни сабр-матонат, собит ирода билан енгиб, соҳа сир-асрорларини эгаллаган, ўзининг меҳнати билан ҳамкасбларининг ҳурматини қозонган сафдор Жамшид Қўчқоров ўз касбининг жонкуярларидан.
У ҳозирда вилоят ИИБ ЖХХ ЖТСБ Кинология бўлинмаси кичик инспектор-кинологи лавозимида фаолият олиб бормоқда.
Касбдошларим жониворларнинг тилини тез топишимнинг сири нимада эканлигини сўрашади. Мен уларга «Меҳр ҳамма учун тушунарли тил», деб жавоб бераман, — дейди Жамшидбек.
У ўзига бириктирилган «Ягус» лақабли хизмат ити билан биргаликда кўплаб ўғрилик ва гиёҳвандлик воситалари билан боғлиқ жиноятларни фош этишга ҳисса қўшишди.
©️ «Postda» газетаси, Маҳлиё Холова, Навоий вилояти.