Фарғона вилояти ички ишлар бошқармасида жорий йилнинг 6 ойлик якунлари сарҳисобига бағишланган таҳлилий йиғилиш бўлиб ўтди
2024-07-22 00:55:00 / Янгиликлар
Фарғона вилояти ички ишлар бошқармасида Ички ишлар вазири ўринбосари, Жамоат хавфсизлиги хизмати раҳбари, генерал-майор Бекмурод Абдуллаев ҳамда бошқарма бошлиғи, генерал-майор Азизбек Икрамовлар иштирокида 2024 йилнинг 6 ойлик якунларига бағишланган таҳлилий йиғилиш ўтказилди.
Видеомулоқот тарзида ташкил этилган тадбирнинг марказий студиясида вилоят ИИБ бошлиғининг ўринбосарлари, барча соҳавий хизмат раҳбарлари, шаҳар-туман студияларида эса ички ишлар бўлимлари бошлиқлари, уларнинг ўринбосарлари, бўлинма бошлиқлари ҳамда тегишли мутасадди ходимлар иштирок этдилар.
Йиғилишда бошқарма бошлиғининг биринчи ўринбосари томонидан ўтган олти ой давомида вилоятда жамоат хавфсизлигини таъминлаш, жиноятчиликни жиловлаш ва ҳудудларни рақамлаштириш борасида амалга оширилган кенг кўламли ишлар юзасидан ҳисобот берилди.
Қайд этилганидек, вилоятда умумий жиноятчилик салмоғи аввалги йилларга нисбатан сезиларли даражада камайган бўлсада, айрим жиноят турлари ошиб кетишига йўл қўйилган.
Берилган ҳисобот ҳамда жиноятчилик таҳлилидан келиб чиқиб, баъзи жиноят турлари ошган шаҳар-туман мутасадди раҳбарларига профилактик ишларни янада кучайтириш бўйича аниқ кўрсатма ҳамда топшириқлар берилди.
Йиғилишда сўзга чиққан генерал-майор Бекмурод Абдуллаев жиноятчилик ва ҳуқуқбузарликларнинг барвақт олдини олиш, жамоат хавфсизлигини таъминлаш, «Обод ва хавфсиз маҳалла» Концепциясини амалиётга жорий этиш, «қизил» тоифадаги маҳаллалар билан ишлашда эътибор қаратилиши зарур бўлган устувор вазифаларга тўхталиб, ўзининг зарур таклифларини билдирди.
Тадбир якунида вилоят ҳудудида жамоат тартибини сақлаш, фуқаролар хавфсизлигини таъминлаш, жиноятчиликни жиловлашда ҳамкасбларига ҳар томонлама ўрнак бўлаётган бир гуруҳ ходимлар ҳамда ёшларга ўз тажрибаларини ўргатиб келаётган соҳа фахрийлари муносиб эътироф этилди.
Уларнинг бир гуруҳига вилоят ички ишлар бошқармасининг ташаккурномаси ва қимматбаҳо эсдалик совғалари топширилди.
ИИВ ЖХД Ахборот хизмати