ИИВ Таълим муассасаларида. Олдинда ойдин орзулар
2024-07-05 08:10:00 / Янгиликлар
ИИВ Наманган академик лицейида қабул жараёнлари аллақачон бошланган. Ўқишга 9-синфни тамомлаганлиги тўғрисидаги шаҳодатномага эга бўлган, соғлиғи жиҳатидан ўқишга яроқли деб топилган, дастлабки, махсус-профессионал танлов ва тест синовларидан муваффақиятли ўтган номзодлар қабул қилинади. 2024—2025-ўқув йили учун 2086 нафар номзод мурожаат қилган. Индивидуал-психологик хусусиятларини ўрганиш натижалари якуни бўйича ўтказилган танловлардан 1131 нафар номзод махсус-профессионал танлов синовларига, 824 нафари эса тест синовларини топширишга қўйилди.
Махсус-профессионал танлов 3 босқичда бўлиб ўтди ва ҳар бир босқич 5 баллик тизимда баҳоланди. Шунингдек, номзоднинг саводхонлик, жисмоний тайёргарлик даражаси ҳам аниқланди. Якка тартибдаги якуний суҳбат тарих, она тили ва адабиёт, ҳуқуқшунослик ёки тарбия фанларидан бўлиб ўтди. Эндиликда номзодлар олдида энг сўнгги босқич — якуний тест синовлари турибди. Тест синовлари белгиланган тартиб асосида Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги томонидан таълим муассасаларига қабул қилиш бўйича давлат комиссияси белгилаган муддатларда бўлиб ўтади.
Лицейга 200 нафар ўқувчи қабул қилинади. Шундан 10 фоизини қизлар ташкил этади.
Ўтган ўқув йилида 177 нафар ўқувчи академик лицейни тамомлаб, уларнинг 153 нафари ОТМга ўқишга кирди, шулардан 32 нафари ИИВ Академиясига, 1 нафардан ДХХ Академиясига ва Ҳуқуқни муҳофаза қилиш академиясига, 6 нафари Жамоат хавфсизлиги университетига қабул қилинди.
Тошкент давлат юридик университетига 1 нафар, фуқаролик олий таълим муассасаларига 36 нафар, хусусий ОТМга 65 нафар, чет давлатларга ўқишга кирганлар 11 нафарни ташкил этди. Шунингдек, 4 нафар битирувчи иқтисодий ва хусусий секторларга ишга кирган. 4 нафар ўқувчи ҳарбий хизматни ўтамоқда. Бандлиги таъминланмаган 20 нафар битирувчининг ота-оналари билан суҳбатлар ўтказилиб, лицейдаги ўқув тайёрлов марказига жалб этилди.
Жорий ўқув йилини тамомлаган ўқувчиларимиз айни пайтда олий ўқув юртларига кириш учун тайёргарлик кўрмоқда.
Илҳомжон БУРХОНОВ, ИИВ Наманган академик лицейи директори, подполковник.