Касб фидойиси. Бахтга пешвоз чиқиб
2024-06-26 08:05:00 / Янгиликлар
Ҳаёт кутилмаган туҳфаларга бой. Сирдарё вилояти ИИБ ЙҲХБ Ахборот технологиялари гуруҳи етакчи инспектори, капитан Элёр Қўчқоров илк хизмат фаолиятини бошлаганида ички ишлар тизимида ахборот технологияларидан фойдаланиш кўлами ошиб бораётган давр эди. Айниқса, уни тизимдаги Face ID тизими қизиқтириб қолди.
Ҳайдовчилик гувоҳномасини олишга келган фуқарони суратга олиш жараёнида унинг шахси автоматик равишда аниқланарди. Олинган сурат персоналлаштириш тизимига юборилар, бир неча сонияда шахси тасдиқдан ўтарди.
Бу орада ЙҲХга видео-кузатув тизими, радарлар кириб келди. Ҳар томонлама қулай, инсон омилисиз қоидабузарликларни қайд этиш, шу тарзда уларни камайтириш имконини берувчи ўзига хос тизим эди бу. Гарчанд техниклар кузатув мосламаларини ўрнатиб беришса ҳам, уларнинг интеграцияси, келаётган ахборотларни қайта ишлаш унинг зиммасида эди. Бу анчагина мураккаб иш бўлиб, тизим қоида бузган автомобилни идентификация қилиб берар, лекин унинг эгасига маъмурий баённомаларни расмийлаштиришда хатога йўл қўйиш мумкин эмасди. Бундай хато норозилик келтириб чиқарарди. Шу сабаб Элёр ҳар бир қоидабузарликка алоҳида эътибор берар, хатога йўл қўймасликка ҳаракат қиларди.
Элёр Қўчқоров вилоят чегараларидаги мунтазам блок-постлардаги кузатув камералари ёрдамида 2023 йилда олти нафар қидирувдаги шахсни аниқлашга муваффақ бўлди. Айниқса, жарималарни тўламай юрган ҳайдовчиларни аниқлаш борасида юқори самарадорликка эришилганди.
Ўтган йили 200 дан ортиқ ҳолатда ана шундай автомобиль эгалари ушланди.
Ҳаёт капитан Элёр Қўчқоровга туҳфа қилган энг катта бахт — унинг оиласи. Тақдир унга бир-биридан гўзал тўрт нафар қизалоқни туҳфа қилди. Хизматдан сўнг уйга қайтганида қаршисига югуриб чиқишади. Ана шундай лаҳзаларда бахт унга пешвоз чиқаётганини қалбан ҳис қилади.
Абдураҳмон МУСТАФОҚУЛОВ, ўз мухбиримиз.
Сирдарё вилояти.