Чекка қишлоқларда
2024-06-17 15:00:00 / Янгиликлар
Бир ой давомида ички ишлар органлари, Миллий гвардия, Мудофаа вазирлиги ҳамда ДХХ тизимидаги ҳарбий қисмлар, туман фавқулодда вазиятлар, тиббиёт, Ўрмон хўжалиги, коммунал тизим вакиллари ҳамда маҳаллалар еттиликларидан иборат 5 та гуруҳ томонидан Зомин туманининг Тожикистон Республикаси билан чегарадош ҳудудларида қонунбузарликларнинг олдини олиш, жиноятларни фош қилиш, аҳолининг ижтимоий-иқтисодий муаммоларига ечим топиш мақсадида тезкор профилактик тадбирлар ўтказилди.
Чунончи, «Чилонзор», «Бахт», «Истиқлол», «Чорвадор», «Туркман», «Дуоба» аҳоли пунктларидаги 124 та ташкилот, корхона, муассаса, 4 минг 211 та тураржой ҳамда 13 сўқмоқ йўл кўздан кечирилди.
Мазкур жараёнда ёнғин, сел каби офатлар ҳамда ис газидан заҳарланишнинг олдини олиш юзасидан тушунтиришлар берилди.
Шунингдек, ов қуролларига эга 68 нафар шахснинг ўқотар қуролларни сақлаш қоидаларига амал қилишлари ўрганилди.
Бу йўналишда қонунбузарликка йўл қўйган 14 кишига нисбатан маъмурий баённома расмийлаштирилди.
Умуман олганда, гуруҳлар томонидан бир нафар қидирувдаги шахс қўлга олиниб, 84 та маъмурий ҳуқуқбузарлик аниқланган, 4 та жиноят фош қилинган.
Тезкор профилактик тадбирлар давомида ички ишлар органларида ҳисобда турадиган шахслар, хусусан, муқаддам судланган 38 нафар ҳамда пробация хизмати назорати остида бўлган 30 нафар шахс билан қайта жиноятлар содир этилишининг олдини олиш нуқтаи назаридан суҳбатлар ўтказилди.
Шу билан бирга аҳоли ўртасида жиноятчиликни жиловлаш ҳамда сергакликни ошириш мақсадида тарғибот тадбирлари уюштирилган.
©️ «Postda» газетаси