Хабарингиз бор Бухоро вилояти Ички ишлар бошқармаси бошлиғи подполковник Икромжон Турсунов вилоят ички ишлар бошқармасига қарашли бир қатор соҳавий хизматларнинг таркибий тузилмаларига ташриф буюриб, иш самарадорлигини оширишга доир ўрганишлар олиб бормоқда.

Шу маънода бугун, бошқарма бошлиғи Ички ишлар бошқармаси Жамоат хавфсизлиги хизмати, Жамоат тартибини сақлаш бошқармаси Кинология бўлинмаси Хизмат итлари Питомнигида бўлди.

Ҳозирда Хизмат итлари питомнигида жами 37 бош турли зотли хизмат итлари мавжуд бўлиб, улардан жиноятларни иссиқ изидан фош этишда самарали фойдаланиб келинмоқда.

Бошқарма бошлиғи хизмат итларини кўпайтириш, тарбиялаш, уларни турли йўналишларда ўқитиш, озиқ-овқат ва бошқа турдаги таъминот билан боғлиқ мавжуд муаммоларини ўрганди, шу билан бирга ходимлар, уларнинг иш шароитларини ҳам кўздан кечириб, иш самарадорлигини ошириш, мавжуд муаммоларни бартараф этиш юзасидан таклиф ҳамда тавсияларини эшитди.

Ўрганишлар якунида, бошқарма бошлиғи Хизмат итлари Питомнигининг янги замонавий биносини қуриш учун қулай жой танлаш, қурилиш лойиҳаси ва смета харажатларини ишлаб чиқиш юзасидан масъулларга манзилли топшириқлар берди.

Шунингдек, Ички ишлар бошқармаси бошлиғи Жамоат хавфсизлиги хизмати Пробация бўлими фаолиятини ҳам ўрганди.

Бошқарма бошлиғи Пробация бўлимида олиб борилган ўрганишлар давомида дастлаб, маъмурий бинода ходимлар ҳамда назорат остидаги шахслар учун яратилган шароитларни кўздан кечирди.

Жараёнда, ходимларга хизмат интизоми ва қонунчиликка риоя қилиш, фуқаролар билан мулоқотда хушмуомала бўлиш, шунингдек, назорат остидаги шахсларнинг қайта жиноят содир этишларини олдини олиш, мустақил тайёргарлик асосида ходимларнинг ўз устида мунтазам ишлаши, замонавий билим ва малака кўникмаларини эгаллаши, жисмоний ва жанговар тайёргарлик даражасини ошириб бориши юзасидан топшириқлар берди.

Ички ишлар бошқармаси бошлиғининг бу каби ўрганишлари давом этмоқда.

Бухоро вилояти ИИБ Ахборот хизмати