Бухоро вилояти ҳокимлиги

Масъулияти чекланган жамияти шаклидаги “Parvoz Fayz Plus Baraka” корхонасига кичик саноат зонаси баланасидаги 2000 квадрат метр бино тикувчилик фаолиятини ташкил қилиш учун ажратиб берилган. Бугунги кунда тадбиркорнинг 3 миллиард сўмлик ўз маблағлари ҳисобидан иншоот қайта таъмирланган. 

Тадбиркорлик субъектига зарур дастгоҳ ва ускуналарни сотиб олиш учун “Алоқабанк” вилоят филиали томонидан 4 миллиард 500 миллион сўмлик банк кредит маблағи ажратилган. Ишлаб чиқариш субъекти тўлақонли иш юритиши учун зарур инфратузилма, электр ва табиий газ тармоғига уланган, сув, оқава тизими шай қилиниб, ҳудуд ободонлаштирилган.   
Корхонада 400 нафардан ортиқ ишчи ўрни яратилган бўлиб, улар замонавий тикувчилик ускуналари билан таъминланган.

Ишчиларнинг аксарини хотин-қизлар ташкил этаётган цехда улар ойлик маоши 3-4 миллион сўм атрофида. Фабрикада тайёрланаётган кийим-кечак маҳсулотлари нафақат ички бозор учун, балки хорижий давлатларга ҳам экспорт қилиниши режалаштирилмоқда. Бу эса маҳаллий ишлаб чиқарувчиларнинг халқаро бозордаги мавқеини мустаҳкамлаш, мамлакатимиз экспорт салоҳиятини оширишда катта имконият яратади.

— Авваллари уй шароитида кичик буюртмалар бажарардим. Эндиликда эса замонавий тикув ускуналарида ишлашни ўрганаяпман. Маҳсулотларимиз хорижга ҳам экспорт қилинишини эшитиб, янада кўпроқ иштиёқ билан меҳнат қиляпмиз, — дейди тикувчи қизлардан бири Гулжаҳон Бешимова.—Корхона туфайли мен нафақат иш ўрнига, балки янги касбни мукаммал ўрганиш имкониятига ҳам эга бўлдим. Келгусида тажрибамдан фойдаланиб, ўз шахсий тикувчилик цехимни очишни ният қилганман.

Айтиш жоизки, “Parvoz Fayz Plus Baraka” корхонасининг фаолияти чекка туманда кичик саноат зоналари самарали ишлашига, тадбиркорлик муҳитининг янада яхшиланишига хизмат қилади. Корхонанинг ишлаб чиқариш ҳажми, маҳсудорлик ортгани сайин, янги қўшимча иш ўринлари яратилади. 

Вилоят ҳокимлиги матбуот хизмати