Бухоро вилояти ҳокимлиги

Мамлакатимиз мустақиллигининг қутлуғ 34 йиллиги кенг тантана қилинаётган шу кунларда чекка туман марказидаги “Oʻzbegim” тўйхонасида кам таъминланган ва ижтимоий ҳимоя реестрида рўйхатда турувчи оилаларнинг жажжи фарзандларидан йиғилган 38 нафар боланинг тантанали суннат тўйи ташкил этилди.

Тўйда туман раҳбарияти, болажонларнинг ота-оналари, қариндош-уруғлари, маҳалла фаоллари, меҳнат фахрийлари ва кенг жамоатчилик вакиллари иштирок этдилар. Тадбирда сўз олган туман ҳокими Хуршид Тохиров:

—  Бугун биз фарзандларимизнинг бир умрлик эсда қоларли қувонч-шодиёнасига шерик бўлиб турибмиз. Уларнинг кўнглини кўтариш, келажакка ишончини мустаҳкамлаш—барчамизнинг бурчимиз, албатта. Давлатимиз раҳбарининг ташаббуси билан бугун эҳтиёжманд оилаларни иқтисодий “соғломлаштириш”, уларда вояга етаётган навқирон авлод таълим-тарбиясига жиддий эътибор қаратиш, камбағалликни қисқартириш ва оилаларни доимий даромад манбаига эга қилиш бўйича кенг кўламли ислоҳотлар амалга оширилаётгани ўз самарасини бермоқда. Бунинг натижасида туманимизда ҳам оилалар турмуш даражаси оширилаётгани биз учун улкан муваффақиятдир. 

— Бугун суннат тўйи нишонланаётган ўғлонлар орасида менинг ҳам фарзандим бор. Бизга кўрсатилаётган бу эътибор ва ғамхўрликдан бошимиз осмонга етди,—дейди оила бекаларидан бири Анора Нишонова.—Ўғлим ҳам роса хурсанд бўлди. Айниқса, фарзандларимизга бош-оёқ сарупо кийгизилиб, велосипед ва бошқа эсдалик совғалари тақдим қилингани қалбимизни янада қувончларга тўлдирди. Бу хайрли иш бошида турган ҳокимлик, ҳомий тадбиркорлар, ҳаммага минг раҳмат!  Келгусида албатта, фарзандимизни яхши ўқитиб, тарбиялаб, юртимизга фойдали инсон бўлиб етишиши  учун ҳаракат қиламиз.  

Тўй тантанасида нуронийлар юрт тинчлиги, эл фаровонлиги, Ватан ободлигини тилаб дуога қўл очдилар. Хушовоз хонандаларнинг дилтортар куй-қўшиқлари эса тўйга янада файз бағишлаб, болажонлар ва уларнинг яқинларига олам-олам қувонч улашди.

Вилоят ҳокимлиги матбуот хизмати