Мустақиллик иншоотлари: Пешку тумани «Сўсана» маҳалласида 40-сонли умумтаълим мактаби янги биноси фойдаланишга топширилди
2025-08-28 18:55:00 / Янгиликлар
Ўзбекистон Республикаси давлат мустақиллигининг 34 йиллик байрами олдидан Пешку туманида ҳам таъмирталаб мактаб ва мактабгача таълим муассасалари мукаммал таъмирдан чиқарилиб, талаб даражасида жиҳозланмоқда, ўқув биносига эҳтиёжи бўлган маҳалла ва қишлоқларда таълим масканлари барпо этишга етарли сармоя ажратилаётгани юқоридаги фикримиз далили.
Бугун туманнинг «Сўсана» маҳалла фуқаролар йиғини аҳолиси учун ўзгача кун. Сабаби «Ватан учун, миллат учун, халқ учун» деган эзгу ғоя асосида нишонланаётган жонажон Ватанимиз мустақиллигининг 34 йиллиги арафасида бу ҳудудда 40-сонли умумий ўрта таълим мактабининг янги ва замонавий андозада барпо қилинган ўқув биноси ўз фаолиятини бошламоқда.
Туманнинг чекка маҳалласида 180 ўқувчи ўрнига эга, икки қаватдан иборат замонавий иншоотнинг бунёдкорлик ишлари пудратчи сифатида «Шофиркон Жўйнав қурилиш» МЧЖ корхонаси бинокорлари томонидан белгиланган муддатда, сифатли рўёбга чиқарилди. Бу бино қурилиши учун маҳаллий бюджет маблағлари ҳисобидан умумий қиймати 4 миллиард 950 миллион сўм сармоя ажратилди.
Таълим маскани очилишида туман ҳокими Ҳаёт Давлатов бошчилигидаги мутасаддилар, жамоатчилик вакиллари, маҳалла фаоллари қатнашдилар. Сўзга чиққанлар сўнгги йилларда пешкуликлар ҳаётида қатор жабҳаларда янгиланиш ва бунёдкорликлар рўй бераётгани, маҳалла ва қишлоқлар қиёфаси ўзгариб, аҳоли турмуши яхшиланаётганини эътироф этдилар. Янги ўқув бинолари қурилишида жонбозлик кўрсатган бинокорларга ҳам самимий миннатдорлик билдирилди.
Шундан сўнг, ўқув муассасаси рамзий алвон лентаси қирқилгач, йиғилганлар таълим даргоҳларида баркамол авлод таълим-тарбияси учун яратилган шарт-шароит билан яқиндан танишдилар.
Вилоят ҳокимлиги матбуот хизмати