Қоракўл: “Ҳасанобод шифо бол” фермер хўжалиги ва Искандаровлар оиласи Жиғачида асаларичиликни ривожлантирмоқда
2025-08-28 14:50:00 / Янгиликлар
Аҳолининг томорқадан унумли фойдаланиши, бозор ва аҳоли дастурхони тўкинлигига муносиб ҳисса қўшиш хусусида гап кетганда, олис туманда жиғачилик томорқачилар биринчилар қаторида тилга олинадилар. Деҳқончилик, асосан томорқачилик ривожланган маҳаллада ҳозирда 3 минг 200 нафарга яқин аҳоли истиқомат қилаётган бўлиб, томорқа ери 76 гектарни ташкил этади. Шундан қарийб 5 гектарда жиғачиликлар иссиқхона барпо этиб, йил бўйи пешма-пеш сабзавот-полиз маҳсулотлари етиштириш тажрибасини ўзлаштирмоқдалар.
Бу ҳудудда эрта баҳордан карамнинг турли навларига мансуб турларидан экиб етиштириш оммалашган. Маҳаллий навга мансуб бош карам, шунингдек, салатбоп гулкарам ва яна броколли, корейс карамини экиб етиштириш хўжаликларга яхшигина даромад келтирмоқда. Жиғачилик деҳқонлар етиштирган карамлар анчадан буён бозор пештахталарида сотилмоқда.
Жумладан, жиғачилик Искандаровлар оиласини ҳамма ”асалчилар оиласи” деб атайди. Хонадон аъзолари асаларичилик соҳасининг бошини тутганига 40 йилдан ошган, катта тажрибага эга. Ишнинг кўзини билган асаларичи Ғайрат Искандаров ўтган йили парваришланган 1200 та асалари оиласидан 25 тоннадан зиёд шифобахш асал жамғарган. Айни пайтда ҳам Искандаровлар оиласи асаларичилик хўжалигида 1300 тадан ортиқ асалари уясини парваришлаб, ҳар мавсумда баракали бол йиғиб олишмоқда.
Бугунги кунда Жиғачи ва шу ҳудуддаги юздан ортиқ хонадон асаларичиликдан мунтазам даромад топаётганида, ҳар бир хонадонда ўртача 10 тагача асалари уяси парваришланаётгани ва бу орқали аҳоли турмуши яхшиланаётгани замирида Искандаровлар оиласи асаларичилари ва “Ҳасанобод шифо бол” фермер хўжалиги ҳиссаси бор, албатта. Аҳоли томонидан йиғиб берилган табиий асал хўжалик томонидан сотиб олиниб, қадоқланиб истеъмолчиларга етказилмоқда.
Хонадони асал етиштириш билан бирга, она асалариларни кўпайтириш, соҳа ишига қизиққан қишлоқдошларга тарқатиш билан ҳам шуғулланади. Ҳар йили эрта баҳорда 50 дан ортиқ хонадонга 300 тага яқин асалари оилалари етказиб бериш орқали бир оила моддий манфаатдорлиги билан бирга қишлоқда асал маҳсулдорлиги ҳам оширилмоқда.
“Ҳасанобод шифо бол” фермер хўжалиги йилига 70 тонна асални қайта ишлаш имкониятига эга. Бу ҳажмдаги маҳсулот орқали хўжалик 5 миллиард сўм атрофида даромадга эришмоқда. Шундан сарф-харажат зарур ускуна ва дастгоҳ, иш ҳақи ва бошқаларга ажратилишидан ташқари хўжалик эришадиган соф фойдани чамалаш қийин эмас.
Вилоят ҳокимлиги матбуот хизмати