Бухоро вилояти ҳокимлиги

Видеоконференцалоқа шаклида ўтказилган йиғилишда вилоят ҳокимининг тегишли ўринбосарлари, ҳуқуқни муҳофаза қилувчи идоралар раҳбарлари, шаҳар-туманлар ҳокимлари, ташкилот ва бошқармалар мутасаддилари, мактабгача ва мактаб таълими бошқармаси, унинг ҳудудий бўлимлари масъуллари, мактаб директорлари иштирок этди. 

Йиғилишни вилоят ҳокими Ботир Зарипов кириш сўзи билан очди ва бошқариб борди. 

Таъкидланганидек, барча замонларда тараққиётнинг асоси ҳам, мамлакатни қудратли, миллатни буюк қиладиган куч ҳам бу – илм-фан, таълим-тарбия ҳисобланган. 

Президентимиз Шавкат Мирзиёевнинг ушбу фикрлари бугун мамлакатимизда таълим тизимини ислоҳ қилишдан кўзланган мақсадни бир гапда ифода этиб турибди. Биз кейинги етти йил давомида мамлакатимизда таълимни, илм-фанни ривожлантириш учун бир неча йиллар давомида амалга оширилмаган, бундан юз йил аввал жадид боболаримиз бошлаган, аммо давом эттиришига имкон берилмаган ишларга қўл урдик.

Даҳақиқат, давлатимиз раҳбари таълим соҳасини ислоҳ қилишда, айниқса, мактаб таълимини умумхалқ ҳаракатига айлантириб берди.

Бухоро вилояти мисолида оладиган бўлсак,  бугун ҳудудда фаолият юритаётган 579 та (546 та давлат, 33 та (+6) нодавлат) умумий ўрта таълим мактабида 336 минг 995 нафар ўқувчига 30 минг 645 нафар ўқитувчи таълим-тарбия бериб келмоқда. 

Биргина жорий йилнинг ўзида вилоят мактабгача ва мактаб таълими тизимдаги 271 та таълим муассасасида қурилиш-таъмирлаш ва моддий-техник базасини мустаҳкамлаш ишлари олиб борилиб, ушбу ишлар учун жами 1 триллион 178 млрд. сўм маблағ йўналтирилмоқда. 

-Вилоят тарихида ҳали бир йил ҳисобида бунча миқдордаги маблағ бирор марта таълимга йўналтирилмаган. Кенг кўламли қурилиш таъмирлаш ишлари натижасида мактаб таълими учун 24 мингтага яқин болалар ва ўқувчи ўринлари яратилиши режалаштирилган. Бу ютуқларнинг ҳаммаси Президентимиз томонларидан соҳага берилаётган эътиборлари натижасидир,-деди Ботир Зарипов.

Таълим сифатини ошириш педагог кадрларнинг сифат таркиби, муаллимнинг касбий маҳоратига боғлиқ экани, сўнгги йилларда ўқитувчиларнинг билими ва касбий маҳоратини оширишга алоҳида эътибор қаратилаётгани, ана шундай чора-тадбирлар туфайли кейинги бир йилда малака тоифасига эга ўқитувчилар сони 23 мингдан (76 %) ошгани эътироф этилди.
 
Педагог кадрларнинг малака тоифаси юқорилиги амалиётда таълим сифатига ижобий натижа кўрсатаётгани мактаблар кесимида таҳлил қилинди. 

Қайд этилишича, биргина ўқитувчининг ойлик маоши малака тоифасини ошириш орқали 38 фоизгача, директор жамғармасидан ҳар ойлик белгиланадиган устама ҳақлар орқали 40 фоизгача, фанни ёки чет тилларни билиш даражаси орқали 50 фоизгача ошиб боради. Шу имкониятлардан фойдаланиб, 1000 АҚШ доллардан юқори маош оладиган ўқитувчилар сони 250 нафарга яқин. 

— Бироқ ушбу рақамлар вилоятимизнинг мавжуд потенциали учун жуда камлик қилади, - деди вилоят раҳбари. 

Яна бир таҳлил: 2025 йилда 41 нафар мактаб ўқувчилари республика ва халқаро фан олимпиадаларида ғолибликни қўлга киритди.

Мактабларда ўқувчи ва ходимлар давоматининг ҳаққонийлигини таъминлаш, инсон омилини кескин камайтириш мақсадида Бухоро шаҳридаги 15 та мактабда электрон давомат (Face ID) тизими жорий этилмоқда. Ушбу тизимни жорий йил якунига қадар ҳар бир ҳудудда камида 20 фоиз мактабларда жорий этиш зарурлиги таъкидланди. 

Шунингдек, шаҳар-туманлар ҳокимлари, тегишли масъулларга таълим муассасаларини келгуси куз-қиш мавсумида барқарор ишлашига комплекс тайёрлаш мақсадида хатлов ўтказиб, муассасаларнинг том қисми ҳамда иссиқлик тизимларида аниқланган муаммоларни бартараф этиш, 10-11-синф ўқувчиларини касб-ҳунарга ўқитиш тизими жорий этилган вилоятдаги 21 та мактабнинг касб хоналарини ўқув дастурлари асосида жиҳозлаш ҳамда ўқув йили давомида талаб асосида хомашё билан таъминлаб бориш,  қўшимча инклюзив синф ва гуруҳлар ташкил этилган 69 та мактаб ва 30 та мактабгача таълим ташкилотини инклюзив таълим муҳитига тайёрлаш,  мактаб ўқувчилари ўртасида жиноятчиликнинг олдини олиш ва ота-оналар масъулиятини ошириш бўйича манзилли профилактик ишлар олиб бориш топширилди.

Бундан ташқари, янги ўқув йили, биринчи қўнғироқ тадбирларини юқори савияда ташкил қилиш бўйича вазифалар белгиланди.

Вилоят ҳокимлиги матбуот хизмати