Қоракўл: Чориевалар хонадони ловиядан 30 миллион сўм даромад топиш ҳаракатида
2025-08-11 10:50:00 / Янгиликлар
Қоракўл тумани, Қозон маҳалласида яшовчи Зебинисо Чориева ҳам айни кунда 10 сотихдан иборат томорқасида ловия етиштирмоқда. Айни пишиқчилик мавсумида хонадон бекаси экин ерида етилган ловиядан кунига 60-70 килограм ҳосил йиғиб олиб, бозорга чиқармоқда. Ҳар бир килограм ловия нархи эса 20-25 минг сўмдан аҳоли дастурхонига етказилмоқда. Шу орқали бир оила қўшимча даромадга эга бўлиб, рўзғор кам-кўстини бут қилмоқда.
— Кейинги йилларда “тўқсонбости” усулида ловия етиштириб, яхшигина даромадга ҳам эга бўлмоқдамиз. Ўтган йили шуни ўзидан 20 миллион сўмга яқин даромад қилган бўлсак, жорий йилда ҳадемай 30 миллион сўмга етказиб фойда олишни ният қилганмиз,—дейди миришкор томорқачи Зебинисон Чориева. — Тажрибамиздан маълумки, ловияни сабзавот экинлари билан аралаш қилиб экиш ҳам мўл ҳосил гарови. Картошка, карам, лавлаги ва помидорлар қаторидан сўнг икки қатор қилиб экилса, томорқадан бир вақтда икки хил ҳосил олса бўлади.
Албатта, томорқа меҳнати хонадон учун қўшимча рағбат ва даромад дегани. Бугун томорқачи деҳқон хўжаликлари қўллаб-қувватланиб, сабзавот-полиз маҳсулотлари, ловия каби дуккакли маҳсулотлар экиш ишлари кенг қамров касб этаётгани аввало рўзғор эҳтиёжларини қондиришга хизмат қилади.
Вилоят ҳокимлиги матбуот хизмати