Бухоро вилояти ҳокимлиги ҳузуридаги “Ягона буюртмачи хизмати” инжиниринг компанияси раҳбари ўзига бириктирилган ёшлар билан учрашди
2025-07-24 15:55:00 / Янгиликлар
Хусусан, жорий йил 14 февраль куни ёшлар билан очиқ мулоқот тарзида ўтказилган видеоселектор йиғилишида давлатимиз раҳбари томонидан маҳаллаларда ёшлар билан ишлаш масалаларини мувофиқлаштириш бўйича республика комиссияси қарори билан “Ёшлар баланси” асосида алоҳида ишлаш талаб этиладиган ёшларни вазирлик ва идоралар, маҳаллий ижро этувчи ҳокимият органлари раҳбарларига бириктириш вазифаси юклатилган эди.
Мазкур топшириққа асосан Бухоро вилояти ҳокимлиги ҳузуридаги “Ягона буюртмачи хизмати” инжиниринг компанияси раҳбари Азизжон Тўхтамишовга Когон туманининг “Туткунда” маҳалла фуқаролар йиғинида яшовчи 13 нафар ишсиз ёшлар бириктирилган.
Олиб борилган ўрганишлар давомида бугунги кунда уларнинг 7 нафари миграцияда эканлиги ва тайинли даромади мавжудлиги аниқланган. Қолган 6 нафари билан юзма-юз гаплашилганда улар қизиқишларига қараб, ўзини ўзи банд қилиши учун тикув машинаси ҳамда пайвандлаш ускунаси кераклигини билдиришган.
Шунга асосан бугун Азизжон Тўхтамишов маҳаллада бўлиб, ўзига бириктирилган ёшлар билан яна бир бор учрашди. Мулоқотда ишсиз ёшларни тадбиркорликка жалб қилиш, бандлигини таъминлаш ҳамда муаммоларини бартараф этиш масаласида фикр алмашилди.
Ёшларнинг ҳар бири билан алоҳида суҳбат қилиниб, муаммо ва таклифлари эшитилди. Уларга тикув машиналари ва пайвандлаш ускунаси топширилди.
Вилоят ҳокимлиги матбуот хизмати