Бухоро вилояти ҳокимлиги

Дастлаб вилоят раҳбари “маҳалла еттилиги” билан мулоқот қилиб, ишсизлик ва камбағалликни қисқартириш, аҳоли фаровонлигини ошириш, инвестисия ва экспорт салоҳиятини юксалтириш, аҳоли кайфиятига салбий таъсир кўрсатувчи муаммоларни ҳал қилиш, хотин-қизлар ва ёшлар, миграциядагилар билан манзилли ишлаш, жиноятчиликнинг олдини олиш борасида амалга оширилаётган ишлар ҳақида сўради. Одамларнинг туриш-турмуши билан қизиқди.

Маълумотлардан кўринишича, ҳозирда маҳаллада 1 минг 72 та хонадон, 1 минг 268 та оила таркибида 4 минг 563 нафар аҳоли истиқомат қилади. Асосий ривожланиш драйвери тиббиёт, туризм ва деҳқончилик ҳисобланадиган мазкур маҳаллада хатлов натижаларига кўра, 8 нафар ишсиз фуқаро борлиги аниқланган. Камбағал оила 27 тани, улардаги аҳоли сони 95 нафарни ташкил қилади. 

Вилоят ҳокими айнан ишсиз фуқаролар билан бирма-бир суҳбатлашди. Уларнинг қизиқиши қараб даромадли иш ўринларини таклиф қилинди. Шунингдек, Ботир Зарипов камбағаллик рўйхатида турган маҳалла фуқаролари билан ҳам мулоқот қилиб, уларнинг муаммоларини тинглади. Фуқаролар асосан иш билан таъминлаш, моддий ёрдам, уй-жойни кадастр қилиш, кредит ажратиш каби масалаларда вилоят раҳбарига юзланишди.

Мурожаатларнинг аксарияти жойида ўз ечимини топди, вақт талаб қиладиган масалалар бўйича масъулларга топшириқлар берилди. 

Ботир Зарипов шу куни тегишли ўринбосарлар, “маҳалла еттилиги” ва бошқа масъуллар билан қатор хонадонларда ҳам бўлди. Оила вакиллари билан мулоқот қилиб, уларнинг муаммолари билан қизиқди.

Якунда Ботир Зарипов ўрганишлар давомида билдирилган ҳар бир таклиф ва мурожаат алоҳида назоратга олиниб, уларнинг ижроси таъминланишини таъкидлади.

— Бажарилган ишлардан қиладиганларимиз ниҳоятда кўп. Буниям биламиз. Яна бир масала шуки, маҳалладаги муаммоларни ҳал қилишда "еттилик" вакиллари ташаббускор бўлиши зарур. Яъни маҳаллада маънавий-маърифий муҳит барқарорлигини таьминлаш, жиноятчиликнинг олдини олиш, ишсизликни камайтиришда уларнинг роли муҳим. Ана шунда ҳаётимиз янаям ўзгаради, – деди Ботир Зарипов.

Шу билан бирга “еттилик” вакилларига маҳаллаларни ободонлаштириш, аҳолининг томорқадан фойдаланиш маданиятини ошириш, аҳолининг тадбиркорлик ташаббусларини қўллаб-қувватлаш, жиноят ва ҳуқуқбузарликларнинг олдини олиш бўйича аҳоли ўртасида тарғибот ишларини кучайтириш ва бошқа бир қатор йўналишлар бўйича топшириқлар берилди.

Бу каби ўрганишлар Бухоро шаҳрининг бошқа маҳаллаларида ҳам давом этмоқда.

Вилоят ҳокимлиги матбуот хизмати