Пешку: оғир маҳаллада ариқ ўзани бетонлаштирилиб, артезиан қудуғи ва янги трансформаторлар ўрнатилди
2025-07-12 16:00:00 / Янгиликлар
Ўзбекистон Республикаси Президентининг 2025 йил 3 январдаги "2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида" ги ПҚ-1-сонли қарори юзасидан чекка туманнинг Ибн Сино маҳалласидаги кўчаларга 8 та видеокузатув камераси, тунги ёритиш чироқлари ўрнатилиб, 300 метр масофадаги пиёдалар йўлаги қурилгани профилактик нуқтаи назардан мақсадга мувофиқдир.
Шу билан чекланиб қолмасдан, оғир ижтимоий ҳудуд сифатида Ибн Сино маҳалласида аҳоли талаб ва мурожаатларидан келиб чиққан ҳолда 1400 метр ички ариқ ўзани бетонлаштирилиб, 70 гектардан ошиқ аҳоли мавжуд томорқаларини суғориш тармоғи яхшиланди. Шу кунгача электр энергияси таъминотида тез-тез кузатилган узилишларни бартараф этиш мақсадида тармоқда 2 та янги трансформатор ўрнатилиб, кабель линияси таъмирдан чиқарилган.
Худди шундай, “оби ҳаёт”га бўлган эҳтиёжни қоплаш мақсадида маҳаллада яна 2 та артезиан қудуғи ўрнатилгани кўпларнинг мушкулини осон қилмоқда. Аҳоли томорқа ерларидан самарали фойдаланиб, рўзғорга зарур сабзавот-полиз маҳсулотларини экиб етиштиришда сув таъминотинингг ўрни беқиёс, албатта.
Қолаверса, ўтган йили айнан Ибн Сино маҳалласида инвестиция дастури асосида узунлиги 3,2 километр йўл таъмирдан чиқарилиб, шундан 700 метрдан ошиқ йўл қисми бетонлаштирилгани ва 2,5 километр йўл қисмига асфальт бостирилгани кўпларни мамнун қилмоқда. Бу саъй-ҳаракатда пудратчи сифатида "Peshku trans qurilish" МЧЖ ишчи-мутахассисларининг алоҳида жонбозлиги бор.
Вилоят ҳокимлиги матбуот хизмати