Жондор: “Ойтуғди” ва “Ибн Сино” МФЙ ларида қарийб 6 километр ички йўл асфальтлаштирилмоқда
2025-06-18 11:20:00 / Янгиликлар
Жумладан, Лоло, Луқмон, Қуйи Луқмон, Хумин, Дарвеши, Пўлоти, Ушот, Алели, Навгади каби маҳалла фуқаролар йиғинларида яшовчи аҳоли учун рисоладагидек йўл, хавфсиз қатнов учун зарур шарт-шароит яратилмоқда. Муҳими, йўл солишдек хайрли ишда маҳаллий фаоллар, тадбиркорлик субъектлари қўллаб-қувватлаши билан бу ишлар кенг қулоч ёймоқда.
Аҳоли учун қулайлик яратиш, ички инфратузилмани яхшилаш мақсадида туманда йўлсозлик ишлари изчил давом эттирилмоқда. Жумладан, “Ойтуғди” МФЙ даги ички йўлнинг кейинги пайтда таъмирталаб кўринишга келган 3 минг метр қисмига асфальт бостирилмоқда.
Мазкур лойиҳани рўёбга чиқаришда пудратчи "AMIRBEK GOLD WAY SERVICE" МЧЖ ишчи-мутахассислари жонбозлик кўрсатишмоқдла. Ҳозирда бу йўлнинг икки ёқа томони бўйлаб 1 метр кенгликда шағаллаштириш ишлари олиб борилмоқда.
Мазкур лойиҳа умумий қиймати 1 миллиард 499 миллион сўмни ташкил этади.
Шунингдек, тумандаги “Ибн Сино” МФЙ га қарашли Бўстонобод қишлоғидаги ички йўлнинг 2600 метр қисмини асфальтлаштириш ишлари ҳам якунига етказилмоқда. Бу ишлар маҳаллий пудратчи "BAHODIR CHAROS DILROZ" МЧЖ томонидан амалга оширилмоқда. Мазкур манзилдаги йўлсозлик ишлари ҳам маҳаллий бюджет маблағи ҳисобидан 1 миллиард 499 миллион сўмга молиялаштирилган.
Асосийси, кўп йил ўнқир-чўнқир бўлиб, аҳолининг ҳақли эътирозига сабаб бўлиб келаётган кўча ва йўллардаги ташвиш-муаммо бугунга келиб ечимини топаётганидан, йўловчи ва ҳайдовчиларга қулай шарт-шароит яратилаётганидан маҳалла аҳли хурсанд. Умуман, жорий йил биринчи ярмида туманда умумий узунлиги 60 километрга яқин йўлни таъмирлаш ва асфальтлаштириш чора-тадбири кўрилмоқда. Ушбу лойиҳалар йўлларнинг сифатини яхшилаш, аҳолининг ҳаракатланишини қулайлаштириш ва яшаш шароитларини янада яхшилашга хизмат қилади.
Вилоят ҳокимлиги матбуот хизмати