Бухоро вилояти ҳокимлиги

Ўтмиш, тарих ва замон кесишган Бухорои шарифда қадриятларимиз ва маданиятимизни янада юксалтириш билан биргаликда, аҳолини даромадли қилиш мақсадида ҳунарманд тадбиркорларга зарур шарт-шароит яратиб берилмоқда.

Буни "Чорбахосса" маҳалла фуқаролар йиғини ва ундаги ҳунармандлар фаолияти мисолида ҳам кўришимиз мумкин. 

Ушбу маҳаллада 7580 нафар аҳоли, 2018 та оила ва 1240 та хонадон мавжуд бўлиб, асосий ривожланиш “драйвери” хизмат кўрсатиш тармоғидир. Берилаётган имкониятлардан унумли фойдаланган ҳолда тадбиркорлик фаолиятини йўлган қўйган моҳир ҳунарманд Нурхон Ғаффорова шу маҳалланинг Мақсуд Карим кўчасида истиқомат қилади. Бу аёлга давлат томонидан 50 миллион сўм кредит маблағи ажратилган бўлиб, сармоя ҳунармандчиликнинг ўзига хос тури миллий патдўзи кўринишидаги қўл сумкалари тикишга сарфланмоқда. Бу билан яна бир ўзига хос тадбиркорлик иши йўлга қўйилди.   

Аҳамиятли томони, маҳаллада “Устоз-шогирд” анъанаси асосидаги фаолият  изчил давом эттирилмоқда. Ўнлаб оила бандлигини таъминлашда ҳиссасини қўшаётган Ғаффоровалар хонадони ҳунармандлари қўшимча равишда Жондор туманидаги 15-20 нафар хотин-қизни ҳам уй меҳнати, касаначилик билан банд этишда жонбозлик кўрсатишмоқда. Уй шароитида патдўзи гулларни тикиш учун андозалар тайёрлаб, тақдим этилмоқда. 

Албатта, қўл меҳнати, ҳунар ривожи ортидан моддий манфаатдорлиги ошаётган оилавий ҳунармандчиликда шогирдлар бир ойда 2,5-3,5 миллион сўмгача  иш ҳақи олишмоқда. Сабр-матонат ва яратувчанлик қобилятини талаб этадиган машаққатли меҳнат ортидан келаётган бир ойлик соф фойда ўртача 10-12 миллион  сўмни ташкил этмоқда. Ўзига хос сеҳрли ва тарихий аҳамиятга эга Бухорода шу каби ҳунарманд чеварлар ва улар шогирдлари қўли билан яратилаётган ноёб санъат асарлари жозибадор ва миллийлиги билан халқимиз ва сайёҳларни лол қолдириб келмоқда.

Вилоят ҳокимлиги матбуот хизмати