Бухоро вилояти ҳокимлиги

Бу борада Ўзбекистон Республикаси Президентининг 2017 йил 29 мартдаги «Ўзбекипаксаноат» уюшмаси фаолиятини ташкил этиш чора-тадбирлари тўғрисида”ги қарори дастуриламал вазифасини ўтамоқда. Қарорга мувофиқ ипак қурти парваришлаб пилла етиштирилган давр тизим касаначилари учун йиллик иш стажи бўлиб қўшилмоқда ва бу пенсия тайинлашда алоҳида ҳисобланмоқда.

Кўп тармоқли агросаноат мажмуасининг пилла етиштириш тармоғида биргина туманда айни кунда 4 мингдан ортиқ касаначи ва оилавий звено, шунингдек, ҳудуддаги 300 тага яқин фермер хўжалиги аъзоларининг бандлигини кўриш мумкин. Қамров ўсиб бораётгани ҳисобидан “кумуш тола” салмоғи ҳам юксалмоқда. Қиёсан олганда, 2022 йилда туман пиллакорлари томонидан 256 тоннадан зиёд саноат учун қимматбаҳо хом ашё етиштирилган бўлса, ўтган 2024 йил баҳор мавсумида қоракўллик пиллакорлар 5 322 қути ипак қурти парваришлаб, шундан якунда 343 тоннага етказиб пилла хирмонини барпо этишга муваффақ бўлдилар. 

Кўриниб турибдики, “кумуш тола” хирмони икки йил бурунгисидан 86 тоннага салмоқлироқ. Бунда ҳар қутидан олинаётган ҳосил салмоғи ўртача 65 килограмга етаётган бўлса, ҳудудда ипак қурти боқиб, моддий манфаат кўриш истагида бўлган хонадон сафи ҳам кенгаймоқда. Бунинг учун узоқ йиллардан бери пиллачиликда юқори ҳосилдорликка эришиб келаётган 4325 та касаначи ва оилавий звено билан тўғридан-тўғри шартномалар тузилган.

Ромитан туманида фаолият юритаётган "Romstar" пиллани қайта ишлаш корхонасида Қоракўл, Олот, Жондор, Ромитан туманларидаги 11 мингдан ортиқ касаначи ва оилавий звенолар томонидан етиштирилган пилла қабул қилиниб, ипак калаваларга айлантирилади. Ўтган йилларда ипак тола Эрон, Хитой, Въетнам, Россия каби давлатларга экспорт қилинган. 

Жорий мавсумда ҳам чекка туманда ипак қурти боқувчиларга жорий мавсум олдидан буюртмачи ва таъминотчи томони "Romstar" МЧЖ томонидан ҳар қути ипак қурти учун 500 минг сўм аванс–бўнак пули тарқатилиб, ҳосил қабул қилишда режадан ортиқча ҳар килограм пилла учун тарози бошида 50 минг сўмдан пул берилаётгани оилавий звенолар меҳнатига муносиб рағбатдир.

Шу кунларда туман пилла қабул масканида иш қизғин. Бир ой машаққат чекиб қилинган меҳнат маҳсули “кумуш тола” хирмони юксалмоқда. Ҳар йилги анъанага кўра, деҳқончилик мавсумининг илк ҳосили – “кумуш тола” қабулига жадал киришилган. Туман ҳокими Хуршид Тоҳиров бу ердаги пиллакор касаначилар, пешқадам оилавий звенолар жамоаларини эришаётган ютуқлари билан қутлаб, ҳосилга барака тилади. Илғор пиллакорлар эсдалик совғалари ва ошириб бажарилган ҳар килограм учун тарози бошида мукофот пулларини қабул қилмоқдалар.  

Вилоят ҳокимлиги матбуот хизмати