Ботир Зарипов вилоятимиздаги миллий маданий марказлар раҳбарлари билан мулоқот қилди
2025-05-01 19:35:00 / Янгиликлар
Инсонпарварлик тамойилларига асосланган жамиятимизда миллатлараро тотувлик муҳитини мустаҳкамлаш ва миллий маданий марказлар фаолиятини мувофиқлаштиришга доир олиб борилаётган изчил саъй-ҳаракат самараси ўлароқ, бугун вилоят ҳокими Ботир Зарипов вилоятдаги миллий маданий марказлари раҳбарлари билан учрашиб, уларга зарур шарт-шароитни яратиш, моддий-техник имкониятларини яхшилаш борасида мулоқот қилди.
Маълумотларга назар солсак, айни кунда вилоятда 12 та миллий-маданий марказлар фаолият юритмоқда. Ўзбекистон Республикаси Президентининг 2018 йил 4 майдаги “Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида”ги Фармонига мувофиқ, 2021 йилда Бухоро шаҳри, Иброҳим Мўминов кўчаси, 30-уйда Нодавлат- нотижорат ташкилотлари “Дўстлик уйи” ташкил этилган.
Мазкур бинода миллий-маданий марказлар учун алоҳида хоналар ажратилиб, зарур компьютер жамланмаси, ахборот технологиялари, қаттиқ ва юмшоқ мебель билан таъминланган. Ҳозирда бу масканда 10 та миллий маданий маркази ҳамда 4 та нодавлат-нотижорат ташкилоти фаолият юритмоқда.
Шунингдек, миллатлараро тотувлик, диний бағрикенглик мавзуларида вилоят телевидениесида ҳар ҳафтада бир маротаба “Олтин силсила”, тожик тилида “Поёми рўз”, рус тилида “Неделя” кўрсатувлари эфирга узатиб келинмоқда. Халқ депутатлари вилоят Кенгаши муассислигида “Бухарский вестник” газетаси рус тилида ҳафтада икки маротаба чоп этилмоқда. Миллий-маданий марказлар томонидан вилоятда истиқомат қилаётган турли миллатларнинг урф-одатлари, қадриятлари, кийимлари ҳамда миллий таомларини акс эттирувчи “Сабантўй”, “Масленица”, “Халқлар дўстлиги куни”, “Бағрикенглик ҳафталиги” каби байрам тадбирлари ўтказиб келинмоқда.
Вилоят ҳокими билан самимий кечган мулоқотда Туркман маданият маркази вилоят бўлими раҳбари Олим Раҳматов, “Ўзбекистон-корейс маданий марказлари” ассоциацияси вилоят ҳудудий бўлинмаси раиси Родион Ли, “Согласие и мелосердие” рус миллий-маданий маркази раиси Наталья Чопанашвили, “Светлица Польска” Ўзбекистон-“Польяк” маданий маркази вилоят бўлинмаси раиси Надежда Монич, вилоят тотор-бошқирд миллий маданий маркази раиси Равиль Забиров, “Viyedergeburt” Ўзбекистон “Немис” маданий маркази вилоят ҳудудий бўлинмаси раиси Лубат Штирцинбехер, Ўзбекистон “Турк” миллий маданий маркази вилоят бўлими раиси Жума Шукуров, вилоят "Офтоби Сўғдиён" тожик-форс миллий-маданий маркази раиси Рауф Авезов, Озарбайжон миллий-маданият маркази вилоят филиали раҳбари Марал Мамедовалар мурожаатлари тингланди.
Мулоқотда вилоят ҳокими Ботир Зарипов томонидан миллий маданий марказлар моддий-техник имкониятларини яхшилаш, марказлар аъзоларига зарур ижтимоий-тиббий, маънавий-моддий ёрдам бериш чора-тадбирларини кўриш юзасидан масъулларга тавсия ва топшириқлар берилди.
Вилоят ҳокимлиги матбуот хизмати