Бухоро вилояти ҳокимлиги

Шу кунларда Рреспубликамиз бўйлаб Миллий гвардия ҳарбий қисм ва муассасаларига 2025 йилда янги чақирилган муддатли ҳарбий хизматчиларни “Ватанга қасамёд” қабул қилиш маросимларига бағишланган тантанали тадбирлар ўтказилмоқда.

Хусусан, Арк қўрғони олдида бўлиб ўтган тадбирда ёш аскарлар қасамёдда битилган муқаддас сўзларни тилга олиб, Ўзбекистон халқига ва Президентига садоқатли бўлишга, Ўзбекистон Республикаси Конституцияси талабларини сўзсиз ва виждонан бажаришга, халқ ва давлат манфаатларини ҳимоя қилишга тантанали равишда ваъда бердилар. Тадбирда ҳар бир ёш муддатли ҳарбий хизматчиларга Президент совғаси, китоблар жамланмаси тантанали равишда топширилди.

Тадбирда вилоят ҳокими, ҳарбий-маъмурий сектор раҳбари Ботир Зарипов, ҳамкор ташкилотлар мутасадди раҳбарлари, жамоатчилик вакиллари, отан-оналар иштирок этишди.

Вилоят ҳокими Ватанга қасамёд қабул қилган барча ёш аскарларни ҳамда уларнинг тадбирда иштирок этаётган яқинларини самимий муборакбод этди. 

Шунингдек, Миллий гвардия бўлинмаларида муддатли ҳарбий хизмат ўташ учун киришаётган ёш ўғлонлар  бир йил қисқа вақт  бўлса-да, ҳар бир дақиқадан унумли фойдаланган ҳолда командирлар томонидан бериладиган ҳарбий билим ва кўникмаларни мустаҳкам эгаллаб, Ўзбекистон Республикаси Президенти, Қуролли Кучлар Олий Бош Қўмондони томонидан Миллий гвардияга билдирилган ишонч ва унинг олдига қўйилган вазифаларни сидқидилдан бажариб, “Бурч, Садоқат, Жасорат” шиорига муносиб хизмат қилишларига ишонч билдирилди.

Эътиборлиси шундаки, бир ой давомида ҳарбий хизматга кўникма ҳосил қила олган ёш аскарларнинг кўргазмали чиқишлари барчани бирдек ҳайратда қолдирди. Ўз фарзандларининг йигитлик бурчини адо этишга киришганини кўрган ота-оналар фахр туйғуларини  тўлқинланиб гапириб беришди.

Маросимда ҳарбий оркестор ижросидаги мусиқали ва саф чиқишлари, ҳарбий хизматчи ва ўқувчи ёшларнинг қўл жанги усуллари намойиш этилди.

Вилоят ҳокимлиги матбуот хизмати