Вобкент: 13 та инкубаторияда 5 минг 977 қути ипак қурти жонлантирилиб, парваришлаш бошланди
2025-04-25 17:50:00 / Янгиликлар
Мутахассисларнинг ҳисоб-китоб қилишича, Бухоро вилоятидаги турдош корхоналарда йилига 2 минг 145 тонна пилла хомашёси қайта ишланади. Биргина Вобкент туманини олсак, бу борада жорий йил пилла мавсумида ҳудуддаги инкубаторияларда 5 минг 977 қути ипак қурти жонлантирилиб, парваришлаш учун касаначи ва оилавий звеноларга тарқатилган. Айни кунда фермер хўжаликлари ва касаначилар билан баҳорги мавсумда 360 тоннадан ошириб пилла етиштириш учун контрактация шартномалари тузилган.
— Кўзга илинмайдиган майдагина қуртнинг ривожланиб, оппоқ ва сифатли пилла ўрагунича бўлган даврда мунтазам озуқа етказиб бериш масъулиятли иш ҳисобланади, — дейди Хўжарабод маҳалласида яшовчи тажрибали пиллакор Қумри Ражабова. — Шу боис, туманда тут плантацияларини кенгайтириш, мавжуд тутзорларни талаб даражасида сақлаш, кўчатлар экиш ва парваришлашга эътибор қаратилмоқда.
Ҳозирги кунда туманда мавжуд тутзор ҳажми 366 гектарни ташкил этмоқда. "Кумушкент ипаги" МЧЖ балансига ўтказилган тутзорларни янгилаш диққат марказида. Шу боисдан, жорий йил қиш-баҳор мавсумида 14,8 гектар ер реконструкция қилиниб, унда жами 74 минг туп тут кўчати ўтқазилди. Айни пайтда пилла мавсуми пухта тайёргарлик асосида бошланган.
Пилла хом ашёсини қайта ишлашда вилоятда кўзга кўринган корхоналардан бири "Кумушкент ипаги" МЧЖ раҳбари Бекзод Ҳожиевнинг таъкидлашича, пиллани қайта ишлаш корхонаси томонидан мавсум олдидан 14 та ҳудудда ипак қурти уруғларини жонлантириш инкубаторийси ишга туширилган. Йилнинг илк ҳосили учун жадал ҳаракатни бошлаган пиллакорлар иш унумдорлигига эришиш чоралари кўрмоқдалар. Жумладан, «Кумушкент ипаги» ипакчилик корхонаси томонидан касаначилар учун ҳар бир хонадонга сунъий дасталар етказиб бериш йўлга қўйилмоқда. Ипак қурти парваришлайдиган оилавий звеноларнинг ҳар бирига моддий рағбат тариқасида 500 минг сўмдан тақдим қилинмоқда.
Вилоят ҳокимлиги матбуот хизмати