Бухоро вилояти ҳокимлиги

Қадимдан айни баҳор байрами, Наврўз айёми кунларида халқ фольклори, яъни, оғзаки ижодига хос лапарлар, миллий куй-қўшиқлар, ижро қилинса, ёш спортсеварлар баҳорги ўйинларни мароқ билан ўйнаб, завқ-шавқ оладилар. Ана шундай машғулотлардан бири—болалар жамоаларга бўлиниб, қўлларини бир-бирларига маҳкам бирлаштирган ҳолда, ясалган “арғимчоқ”ни узиб ўтиш учун бор кучлари билан ҳаракат қиладиган “Оқ теракми, кўк терак” ўйинидир. Бу машғулот замирида ёруғликнинг қоронғуликдан ғолиб эканига ишора ва интилишдек маъно мужассам гўё.

—Терак барча турдаги дарахтлар орасида энг яхши ҳаво тозаловчи ҳисобланади. Карбонат ангидридни ўзига сингдириб, игна баргли дарахтларга нисбатан 10 баравар кўп кислород ҳосил қилади,—дейди вобкентлик кекса деҳқон Ёдгор бобо Комилов.—Айни пайтда ўзидан зарарли микробларни ўлдирувчи фитонцидлар ҳам ишлаб чиқаради. Бу турдаги дарахтлар манзарали бўлиши ва жой танламаслиги сабабли ихота ва ўрмон муҳофазаси, кўкаламзорлаштириш ишларида муҳим аҳамиятга эга.

Кейинги йилларда Президентимиз ташаббуси билан ташкил этилган ва юртимизда уюшқоқлик билан олиб борилаётган “Яшил макон” дастури доирасида амалга оширилаётган ишларни Вобкент туманида  ҳам кўриш мумкин.  

Жумладан, шу кунларда туман мактабгача ва мактаб таълими бўлими томонидан ҳудуддаги 42 та  умумтаълим даргоҳига терак қаламчалари қурилиб, парваришланмоқда. Жумладан, 5- ва 7-сонли умумтаълим мактаблари ерларида “Яшил макон” умуммиллий лойиҳаси доирасида 70 туп арча, 10 туп мевали кўчат ва 500 дона терак қаламчаси ўтқазилиб, парвариши бошланган. Келгусида тераклардан олинадиган даромад мактабнинг моддий-техник базасини мустаҳкамлашга сарфланиши назарда тутилган. Қолаверса, бу эзгу саъй-ҳаракат орқали атроф-муҳитни яшилликка бурканишига ҳам салмоқли ҳисса қўшилади.

Вилоят ҳокимлиги матбуот хизмати