Бухоро вилояти ҳокимлиги

Айни кунда Когон шаҳрида ҳам  9-сонли умумтаълим мактаби томорқа ерида 2 сотихдан иборат иссиқхона ташкил этилган бўлиб, унда қишки мавсумда ҳам лимон, апельсин каби цитрус мева буталари ниҳоли ўтқазилиб, парваришланмоқда. Қатор орасида эса парваришланган бодринг ҳосилидан бултур 10 миллион сўм даромад олинган бўлса, бу сармоя иссиқхона камчиликларини тузатиш баробарида 5 миллион сўм мактаб кутубхонаси учун 100 дона китоб ва синф хонасига замонавий телевизор харидига сарфлангани айни муддао. Бунда ўқувчилар устозлари кўмагида мактаб ҳовлисида 2 миллион сўмга 150 туп мевали дарахт ниҳоли билан бирга, 100 туп атиргул кўчатини сотиб олиб ўтқазибдилар.

— Шу кунларда меҳнат таълими, ботаника, биология фанларидан тегишли амалий машғулотлар ўқувчиларимизга иссиқхонада ўтказилаётгани ҳам бежиз эмас. Бунда ўқувчиларимизнинг томорқа меҳнатига бўлган қизиқишлари, касб-ҳунар танлашга бўлган иштиёқлари янада ошмоқда,—дейди умумтаълим мактаби директори Отабек Ҳамроев.—Ҳозирда иссиқхонада маҳсулот етиштиришни кўпайтириш, мактаб ерларига мевали ва манзарали дарахт ниҳолларини кўпроқ ўтқазиб, ҳудудни ободонлаштириш ҳаракатидамиз.

Айни кунда темирйўлчилар шаҳри мутасаддилари ҳудуддаги 11 та умумтаълим мактабининг барчасида ана шундай ихчам, замонавий ҳам даромад келтирадиган иссиқхоналар ташкил этиш чораларини кўрмоқда. 

Вилоят ҳокимлиги матбуот хизмати