Бухоро вилояти ҳокимлиги

Бунда шаҳар-туманлар ҳокимлари лойиҳани жой ва инфратузилма билан таъминлаш мажбуриятини олиши, банклар эса тадбиркорлар лойиҳаларига кўмаклашиши, муаммоси бўлса, ҳал этиши, ишсизларни бизнесга жалб қилиши таъкидланди. Шу мақсадда маҳалла банкирлари фаолиятини йўлга қўйиш таклифи билдирилди. 

Хўш маҳалла банкирининг асосий вазифалари нималардан иборат? Бухоро шаҳридаги "Ишга марҳамат" мономарказида ўтказилган йиғилишда шу масала атрофлича муҳокама қилинди. Унда республика Марказий банки бошқарма бошлиғи Н.Комилов, Бухоро вилоят марказий банк бош бошқармаси бошлиғи ўринбосари Ш. Жўраев, Бухоро шаҳар ҳокимининг биринчи ўринбосари Х. Яхёев, секторлар раҳбарлари, тижорат банклари масъул ходимлари, маҳаллалардаги ҳоким ёрдамчилари иштирок этдилар.

Йиғилишда сўз олганлар Бухоро шаҳрига бириктирилган “Алоқабанк”, “Турон банк”, “Бизнесни ривожлантириш банки” ҳамда “Асакабанк”дан танланган 18 нафар ходимнинг 2025 йилда маҳаллаларда олиб борадиган ишлари хусусида тўхталиб ўтишди. Шунингдек, 65 нафар маҳалла агентларини лавозимга танлаш жараёни, улардан талаб қилинадиган асосий мезонлар хусусида фикр-мулоҳаза юритилди. Ишларни тўғри ташкил қилиш орқали Бухоро шаҳрини камбағаллик ва ишсизликдан холи ҳудудга айлантириш ҳақида амалий таклифлар берилди.  

Қолаверса, маҳалла банкирлари аҳоли даромадларини ошириш, ўзаро ҳамкорликнинг самарали тизимини яратишга қаратилган Уйчи, Сайхунобод, Зарбдор ва Ғиждувон туманларининг тажрибасини кенгайтириш бўйича ишларни давом эттириши таъкидланди. Маҳалла банкирлари ўзларига бириктирилган маҳаллаларнинг бизнес имкониятларини ўрганиши, одамлар билан гаплашиб, уларнинг ғояларини лойиҳаларга айлантириши, шунингдек, резидентларни кредит олиш, қайтариш, бизнес очиш ва маҳсулотини сотишга ўргатиши, лойиҳаларга ҳамроҳлик қилиш юзасидан ўз режаларини баён қилишди. 

Йиғилиш якунида маҳаллаларда тадбиркорлик қилиш ниятида бўлган фуқаролар учун бизнес кўникмаларини шакллантириш, банклар томонидан таклиф қилинаётган имтиёзли кредит сармоялари тўғрисида мунтазам маълумот бериб бориш амалиётини жорий қилишга келишиб олинди.

Вилоят ҳокимлиги матбуот хизмати