Бухоро вилояти ҳокимлиги

Мазкур йиғилишда қўйилган вазифалар ижросини таъминлаш мақсадида жумладан, марказий банк вилоят бош бошқармаси ва Бухоро тумани ҳокимлиги ташаббуси билан “Лойиҳалар ярмаркаси” ташкил этилди. Мазкур ярмаркада «Сайхунобод», «Уйчи», «Зарбдор» ҳамда «Ғиждувон» тажрибалари асосида тайёрланган бизнес режалари тақдимоти ҳам бўлиб ўтди.  

Шу куни маҳаллаларга бириктирилган тижорат банклари вакиллари, ҳоким ёрдамчилари ва тадбиркорлар иштирок этган  «Лойиҳалар ярмаркаси» доирасида аҳолининг тадбиркорлик фаолиятига дахлдор ишлаб чиқилган 70 дан ортиқ бизнес режа муҳокама қилинди. Ярмарка доирасида 30 дан ортиқ ташаббускорнинг лойиҳаси тижорат банклари томонидан маъқулланди. 

Биргина мисол, «Работипоён» МФЙ да фаолият юритаётган якка тартибдаги тадбиркор «Исломова Фароғат Самандар қизи» ўтган йили ҳокимнинг маҳалладаги ёрдамчиси томонидан «Ҳар бир оила—тадбиркор» дастури асосида 33 миллион сўм имтиёзли кредит маблағини олиб, бу сармояга 50 миллион сўм ўз жамғармасини қўшиб, хонадонида тикувчилик фаолиятини бошлаган. Ҳозирда бу саъй-ҳаракат билан у маҳалласидаги 15 нафар ишсиз хотин-қизни, шундан, 3 нафари камбағаллик реэстрига кирган, 2 нафар ногиронлиги бўлган фуқарони иш билан банд қилгани таҳсинга лойиқ. 

Куни кеча "Лойиҳалар ярмаркаси"да ЯТТ «Исломова Фароғат Самандар қизи» ўз ишлаб чиқарган маҳсулотлари билан иштирок этиб, имкониятларини кенгайтириш, яна қўшимча 15 нафар иш ўрни яратиш мақсадида 300 миллион сўм миқдорида банк кредит маблағини олмоқчи эканлигини билдирди. 

Шу куннинг ўзида Марказий банк вилоят бош бошқармаси бошлиғи Эркин Мансуров бошчилигидаги ишчи гуруҳи мазкур тадбиркорнинг хонадонида бўлишиб,  фаолияти билан яқиндан танишдилар. Фароғат Исломовани ташвишга солаётган масала шу ерда амалий ечимини топадиган, «Халқ банки» туман филиали томонидан бу кичик корхонага кредит маблағи ажратиладиган бўлди.  

Ўтказилган ярмаркада тадбиркорлик қилиш ниятида бўлган фуқаролар учун бизнес кўникмасини шакллантириш, банклар томонидан таклиф қилинаётган имтиёзли кредит сармояси, яратиладиган иш ўрни, бандликни таъминлаш жиҳатларига ҳам эътибор қаратилди. Қатнашчиларга мутахассислар томонидан тадбиркорликка доир қонунчилигимизга киритилган ўзгартиш ва янгиликлар, имтиёз ва қулайликлар тўғрисида атрофлича маълумот берилди.

Вилоят ҳокимлиги матбуот хизмати