Бухоро вилояти ҳокимлиги

Хусусан, "Жайхунобод" маҳалла фуқаролар йиғинида яшовчи Анвар момо Умирова фарзандлари ва неваралари кўмагида ҳовли этагидаги экин ерининг 6 сотих қисмида иссиқхона барпо қилгани аввало рўзғор ташвишини бартараф этмоқда. Шу кунларда ҳам иссиқхонада иш қизғин, оила аъзолари онахон бошчилигида 2 минг 400 туп "Ferrari" навига мансуб булғор қалампирини экиб парваришламоқдалар.

— Меҳнат қилган одам ҳеч қачон кам бўлмаслигини ўзимиз кундалик ишимиз, иссиқхонамизда етиштираётган маҳсулотимиз, шундан топаётган даромадимиз  мисолида кўрмоқдамиз,—дейди 74 ёшли Анвар момо Умирова.—Кўп йилдирки, ўғилларим ва набираларим билан иссиқхона хўжалигида самарали ишлаб даромад кўрмоқдамиз. Фарзандларим деҳқончилик ҳадисини яхшигина ўзлаштиришганидан хурсандман. Негаки, “ҳолва деган билан оғиз чучимайди”, фақат ҳадлол меҳнат, пешона тери эвазига иссиқхонада ҳосил етиштириш мумкин. Ҳадемай, булғор қалампирининг ҳар кўчатидан 1,5 килограм атрофида, яъни умумий 3,5 тоннадан ошириб ҳосил етиштириш ҳаракатидамиз. 

Албатта, оила меҳнаткашлари ўз эҳтиёжидан ортган маҳсулотни бозорга чиқариб сотишади. Қишки мавсумда эса сара булғор қалампирининг ҳар килограми нархи ўртача 30 минг сўмдан ҳисобланса, бу хирмондан биргина оиланинг эришадиган моддий манфаатдорлиги 105 миллион сўмдан кам эмас. Оила бекасининг айтишича, иссиқхонадаги меҳнат киши саломатлиги учун ҳам кони фойда, пишиб етилган ҳосилни саранжомлаш пайтидаги завқни эса ҳеч нарса билан қиёслаб бўлмайди.        

Бугун пиру бадавлат бир оиладаги онахоннинг ғайрат-шижоати нафақат фарзандлари, балки маҳалладошларига ибрат-намуна десак, муболаға эмас. Ваҳоланки, Анвар момо Умирова хонадонида касб-кори турлича бўлган ўғил-қизлар, қолаверса, неваралар ишдан ортиб иссиқхонада меҳнат қилишдек залворли юкни зиммаларига олишгани бу оиладаги омилкорлик, барқарор ишчанлик муҳитидан далолат. Шунинг учундир, оила дастурхони тўкин, турмуши фаровон, ризқ-насибаси эса бутундир.   
  
Вилоят ҳокимлиги матбуот хизмати