Когон: "Аёллар дафтари”га кирган уй бекалари турар жойи таъмирлаб берилмоқда
2024-12-24 21:10:00 / Янгиликлар
Бугун оғир шароитда яшаётган оилалар ва улардаги хотин-қизларни ҳар томонлама қўллаб-қувватлаш, даромад манбаини яратиб бериш, тиббий хизмат, даволанишга бўлган эҳтиёжини қондириш, яшаш шароитларини яхшилашга алоҳида эътибор қаратилмоқда. Албатта, бунда давлатимиз раҳбари ташаббуси билан ташкил қилинган “Аёллар дафтари” муҳим аҳамият касб этмоқда.
Хусусан, Когон туманида ҳам мавжуд 23 та маҳалла фуқаролар йиғинида ижтимоий қийин аҳволдаги опа-сингилларимизни қўллаб-қувватлаш, “Аёллар дафтари”га киритилганлар учун қулай даромад манбалари яратиш ҳамда кўмак беришга устувор аҳамият қаратилмоқда.
Куни кеча айнан "Аёллар дафтари"нинг боқувчиси бўлмаган эҳтиёжманд хотин-қизлар, ижтимоий ёрдамга муҳтож биринчи ва иккинчи гуруҳ ногиронлиги бўлган, шунингдек, тезкор тиббий муолажага муҳтож эҳтиёжманд хотин-қизлар тоифаларига мансуб, уй-жой таъмирига кўмак сўраган эҳтиёжманд аёлларнинг 5 нафарига мадад ёрдами кўрсатилди. Уйлари том қисмини таъмирлаш мақсадида "Аёллар дафтари жамғармаси" ҳисобидан ҳар бир таъмирталаб турар жой учун 45 донадан шифер, шунга яраша тахта-страпила, керагича мих маҳсулоти етказилгани хонадон бекаларини мамнун қилди.
Жумладан, “Тунироқ” МФЙ да яшовчи Гулихон Ҳусенова, “Хўжа якшаба” МФЙ да яшовчи Манзура Мансурова, “Навруз” МФЙда яшовчи Назира Ниёзқулова, “Баҳоуддин Нақшбанд” МФЙда яшовчи Роҳила Қурбонова, “Ўзбекистон” МФЙда яшовчи Мукаррам Жўраевалар ана шундай эътибор ва рағбатдан баҳраманд бўлдилар.
— Турар жойимиз томи шифер қилинмагани сабабли кўп йиллардан буён ёғингарчилик пайтлари томдан чакки ўтиб, ташвишга қолардик, – дейди “Ўзбекистон” маҳаласида яшовчи Мукаррам Жўраева. — Ниҳоят, маҳалламиздаги ва бошқа масъуллар яшаш шароитимизни келиб кўрганларидан сўнг, ночор пайтимизда бизга мададкор бўлишмоқда. Уйимизни таъмирлашга яқиндан ёрдам бераётганларга минг раҳмат.
Вилоят ҳокимлиги матбуот хизмати