Бухоро вилояти ҳокимлиги

Қабулда вилоят ҳокимининг ўринбосари Фируза Ибрагимова, туман маъмурий секторлари раҳбарлари, туман Халқ қабулхонаси, вилоят ҳамда тумандаги масъул корхона, ташкилотлар мутасаддилари иштирок этишди. 

Сайёр қабулга келган 70 нафар хотин-қизнинг мурожаатларини шахсан қўмита раиси ўринбосари тинглаб, тегишли ташкилот ва идораларга мурожаатларни ҳал этиш юзасидан топшириқ ва тавсияларини берди. Қабулда хотин-қизларнинг уй-жой таъмири, бандлигини таъминлаш, олий таълим контракти, тиббий ёрдам, тадбиркорлик фаолиятига кўмаклашиш, субсидия ажратиш ва оила-турмуш масаласидаги низолари юзасидан мурожаатлари эшитилиб, зарур чора-тадбирлар белгиланди. 

Сайёр қабулда ўз муаммолари билан мурожаат қилган фуқаролардан 13 нафари  Бухоро шахридаги “Artel” компанияси корхонасига ишга жойлаштирилди, 2 нафар эҳтиёжманд аёлнинг уй-жойи “Аёллар дафтари” жамғармаси ҳисобидан таъмирлаб бериладиган бўлди. Шунингдек, бир нафар фуқарога ногиронлик нафақаси тайинланди. Қолаверса, 3 нафар фуқаронинг даволаниши учун ордер берилган бўлса, яна 7 нафар фуқарога имтиёзли кредит маблағи ажратиш учун ҳоким ёрдамчилари томонидан тавсияномалар тайёрлаб берилди. 

Сайёр қабул туфайли ногиронлиги мавжуд бўлган 6 нафар фуқарога реаблитация воситалари берилди. Шунингдек, 4 нафар "Аёллар дафтари"га киритилган хотин қизга Камбағалликни қисқартириш ва бандликка кўмаклашиш маркази томонидан субсидия асосида тикув машинкалари етказиб берилгани қулай имконият бўлди. Имтиёзли кредит асосида 2 нафар фуқарога мотокультиватор ускунаси берилгани, 3 нафар олий таълим муассасаларида таҳсил олаётган ёш қизларимизнинг тўлов шартномалари "Ёшлар дафтари" орқали тўлаб берилаётгани улар учун яна бир имконият. 

Бундан ташқари, 4 нафар боқувчисини йўқотган, ота-онаси вафот этган хотин-қизга белгиланган тартиб асосида шартнома тўловларини тўлаб бериш учун сертификатлар берилган бўлса, 2 нафар фуқаронинг алимент масаласи, газ, электр таъминоти, кадастр бўйича қилинган мурожаатлари ҳам тегишли ташкилотлар томонидан жойида бартараф этилгани мақсадга мувофиқдир. 

Яна бир жиҳати, сайёр қабулда Ёш келин-куёвларни ўқитиш марказида таҳсил олаётган 13 нафар жуфтлик билан "Муқаддас оила" мавзусида семинар-тренинглар ўтказилиб, ўқувни тугатган бўлғуси оила вакилларига сертификатлар берилди. Шу куни судда ажрим масаласида ариза берган 5 та оила билан яраштириш ишлари олиб борилгани натижасида 3 та оила яраштиришга эришилди.

***

Ўзбекистон Республикаси Оила ва хотин-қизлар қўмитаси раисининг ўринбосари Мукаррам Нурматова вилоятга хизмат сафари доирасида Ромитан тумани "BCT" кластерининг "Ўба" маҳалласидаги фермер хўжаликлари пахта далаларида бўлиб, теримда катта хирмонга муносиб ҳисса қўшаётган хотин-қизлар ҳузурида ҳам бўлди.  “Оқ олтин”ни нест-нобуд қилмасдан саранжомлаб, йиғиштириб олишда жонбозлик кўрсатаётган чевар хотин-қизлардан бир гуруҳига эсдалик совғалари улашилди.

Вилоят ҳокимлиги матбуот хизмати