Бухоро вилояти ҳокимлиги

Қурилиш соҳасида бораётган ишларни самарали ташкил этиш, жумладан, замонавий андозалар асосида шаҳарсозлик қоида-меъёрларига мос “Янги Ўзбекистон” массивлари ва шинам кўп хонадонли уйлар қуриш кўламини кенгайтириш, бунда ипотека кредити бозорини янада ривожлантириш мақсадида вилоятимизда ҳам қатор истиқболли лойиҳалар амалга оширилмоқда. 

Айни кунда қурилиш ташкилотлари, шунингдек, ипотекага йўналтирилган тижорат банклари билан ҳамкорликда Бухоро тумани "Боғидашт" МФЙ да ажратилган 44 гектар ер майдонида “Янги Ўзбекистон” замонавий турар жой мажмуасини барпо қилишга жадал киришилган.  

Мазкур массив таркибида умумий  ҳисобда 3 та 10 қаватли турар жой иншооти бунёд этилиши ва уларда жами 198 та хонадонга ёш оилалар кўчиб ўтказилиши кўзда тутилган. Шунингдек, ҳудудда 94 та 9 қаватли иморат қурилиши лойиҳалаштирилган бўлиб, жами 5914 та хонадонга эга бу турар жой уйга эҳтиёжманд оилаларга узоқ йиллик ипотека кредити асосида тақсимлаб берилади. 

Бундан ташқари, обод қилинаётган массивда 15 та 7 қаватли ва жами 784 та хонадонга мўлжалланган замонавий турар жой бинолари қурилиши режалаштирилган. Албатта, ҳадемай кичик шаҳарча кўринишини оладиган бу манзилда аҳолига савдо ва маиший хизмат кўрсатиш иншоотлари, тиббиёт, таълим маскани, бошқа зарур муассасалар фаолиятини йўлга қўйиш тақозо этилмоқда. Лойиҳаларга биноан, бунда 2 та 990 ўринли умумтаълим мактаби, 2 та 180 ўринли мактабгача таълим ташкилоти, яна 1 та  420 ўринли болалар боғчаси, қолаверса, 250 қатновга эга оилавий поликлиника, “экобозор”  ва  ёшлар коворкинг марказини қуриб, талаб даражасида жиҳозлаб ишга тушириш мўлжалланган. Болалар бўш вақтини мазмунли ўтказишлари учун ҳудудда спорт ва  болалар майдончалари ҳам қурилиши режалаштирилган. 

Мазкур массивда олиб борилаётган лойиҳа ва қурилиш бунёдкорлик ишлари вилоят ҳокимлиги, маъмурий сектор кундалик ўрганишлари ва назорати остида. Хусусан, ҳудудда кўзга ташланаётган муаммоларга ечим топиш мақсадида вилоят ҳокимининг ўринбосари Жалол Арашов раҳбарлигида тегишли масъул идора ва ташкилотлар ҳамда қурилиш-пудрат ташкилотлари иштирокида штаб йиғилиши ўтказиб борилмоқда. 

Вилоят ҳокимлиги матбуот хизмати