Кейинги йилларда ёш ўғил-қизларимиз жаҳон ареналаридаги мусобақаларда муносиб иштирок этиб, юрт байроғини баланд кўтариб, ғолиблик нашидасини сурмоқдалар. Бу эса, нафақат баркамол авлод вакилларига, балки ёши катталарга ҳам ғайрат-шижоат бахш этмоқда.

Олис туманнинг "Оқ олтин" маҳалла фуқаролар йиғида ҳам спортсевар ёшлар интилишларини инобатга олган ҳолда замонавий типдаги спорт майдончаси қуриб битказилгани кўпларни мамнун қилди. 

Универсал спорт майдончасини фойдаланишга топшириш тадбирида туман ҳокими Наргиза Неъматова бошчилигидаги маъмурий секторлар раҳбарлари, Ёшлар ишлари агентлиги, маҳалла фаоллари ва спортчи ёшлар ҳозир бўлдилар. Бунда сўзга чиққанлар юртимизнинг спортда довруғ таратаётгани замирида ёшлар таълим-тарбиясига қаратилаётган эътибор, эртамиз эгалари камолоти учун яратилаётган шарт-шароит ётганини таъкиладилар. Мазкур спорт мажмуаси ҳам ана шу фикр далолати экани ва бундан ҳам келгусида маҳалла фахри сифатида чемпионлар етишиб чиқиши қайд қилинди.      

Тадбирда мазкур спорт мажмуаси ёшларнинг бўш вақтини мазмунли ўтказишга хизмат қилишига ишонч билдирилиб, баркамол авлод вакилларининг спортга бўлган қизиқишлари янада ортишига сабаб бўлиши айтиб ўтилди.

Умуман, бугун янги қиёфага кириб бораётган Оқ олтин маҳалласида ёшларнинг бўш вақтини мазмунли ўтказиш мақсадида барпо қилинган универсал спорт майдонида 10 тадан ортиқ спорт тури билан шуғулланиш учун етарли шарт-шароит яратилган.

Вилоят ҳокимлиги матбуот хизмати