Бухоро вилояти ҳокимлиги

Оилавий ҳамжиҳатлиги, умр йўлдоши Ҳаётжон Солиев кўмагида, қолаверса, вояга етказаётган 3 фарзанди билан биргаликда хонадон бекасининг мавжуд имкониятлардан унумли фойдаланаётгани, оилавий тадбиркорликда эришаётган ютуқлари, иш тажрибаси билан бугун маҳалладошларига намуна бўлиб келмоқда. 
 

Айни кунда хонадон ҳовлисидаги экин ери 20 сотихни ташкил этиб, ҳар мавсумда ундан самарали фойдаланилмоқда. Жумладан, айни пайтда 1 сотихдан ошиқ ерда саримсоқпиёз, исмалоқ ва кўкатлар экиб етиштирилгани ўртача 2 миллион сўм даромад олишга замин яратмоқда. 
 

Шунингдек, хўжаликда феврал ойи бошидан 14 сотих томорқа ери алоҳида тайёрланиб, картошка ва бошқа озиқ-овқат маҳсулотларини экиш учун тайёрлаб қўйилган. Ўтган йили баҳор ойларида 200 килограм уруғлик картошка экиб, шундан 1,5 тоннадан орттириб сара ҳосил олишган. Иккинчи ҳосилга булғор қалампири, помидор ва бодринг етиштирилган.  
 

Хонадон бекаси Жамила Расулова оила аъзолари, келини Шарифа Назарова ҳамда ўғли Шамшод Нутфуллаев билан биргаликда оилавий тадбиркорликни ривожлантиришмоқда. Деҳқончилик баробарида 2024 йилдан асаларичилик йўналишида ҳокимнинг маҳалладаги ёрдамчиси тавсияномаси асосида 33 миллион сўм кредит маблағини олиб, бундан 30 та асалари оиласи харид қилинган. Бугунга келиб бу асалари уяси сони 60 тага етказилган. Иссиқ мавсумда, баҳор ва кузда  бу асалари уяларини ҳар биридан 10 килограмдан ошириб бол олинган. Якунланган йилда бир оиланинг асаларичиликдан эришган умумий даромади 75 миллион сўмдан кам эмас. 
 

Эришилаётган моддий манфаатдорлик ортидан оила меҳнаткашлари  имкониятлари, ишчи кучларини чамалаб,  янада каттароқ лойиҳага қўл уришди. Қишлоқ жойида қорамол боққаннинг қут-баракаси бор. Рўзғорда гўшт, сут, қатиқ, сариёғ каби дармондорига бой маҳсулотлар сероб бўлиши, ҳатто улардан маҳалладошлар дастурхонига пешма-пеш етказиб, мўмай даромадга эришиш мумкин. Шу ўйда якдил қарорга келиниб, тижорат банкидан 200 миллион сўм имтиёзли кредит маблағи расмийлаштириб олингани 25 бош наслдор қорамол хариди учун  сарфланди. 
 

“Қизил чўл” зотига мансуб қорамоллар билан бирга “golshteyn”, “smental“ зотларига доир наслдор чорва моллари оғилхонани тўлдирди. Жамила Расулова ҳамда Ҳаётжон Солиевлар хонадонида икки-уч йил бурун шу тартибда астойдил ишга киришилган бўлса, бугунгша келиб оғилхонасида парваришланаётган чорва моллари сони 50 бошга етказилибди.

Кўриниб турибдики, қорамол парваришидан дурустгина моддий манфаатдорликка эришилмоқда. Сут, гўшт маҳсулотлари билан бирга қорамол парваришига қизиққан маҳалладошларга наслдор моллар бузоғидан етказиб берилаётгани ҳам яхшигина даромад.