Когон туманида маҳаллалар хавфсизлиги, жиноятчилик ва ҳуқуқбузарликлар олдини олишга доир фаолият муҳокама қилинди
2026-01-23 12:20:00 / Янгиликлар
Мазкур тадбир Ўзбекистон Республикаси Президентининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит, манзилли ишлаш тизимини жорий этишга қаратилган қўшимча чора-тадбирлар тўғрисида”ги ПҚ–1-сон ҳамда “2026 йилда республика маҳаллаларида жиноятчиликнинг барвақт профилактикаси самарадорлигини янада ошириш бўйича ташкилий чора-тадбирлар тўғрисида”ги ПҚ–2-сонли қарорларининг мазмун-моҳиятини жойларда кенг тушунтиришга қаратилди. Мазкур қарорлар жиноятчиликка қарши курашда тизимли, аниқ ва комплекс ёндашувни кучайтиришга қаратилгани билан аҳамиятлидир.
Йиғилишда вилоят ички ишлар бошқармаси бошлиғи, полковник Икромжон Турсунов ва туман ҳокими Акмал Қазоқовлар иштирокида ҳудудда жиноятчилик аҳволи атрофлича таҳлил қилиниб, хизмат фаолияти жараёнида ходимлар томонидан йўл қўйилган камчиликлар кескин ва танқидий руҳда муҳокама этилди. Хусусан, маҳалла фуқаролар йиғинларида тинчлик-осойишталикни сақлашда қонунчилик талабларига риоя этиш, хизмат ва тартиб-интизомни мустаҳкамлаш, шахсий масъулиятни ошириш масалаларига алоҳида эътибор қаратилди.
Семинарда ижтимоий профилактика самарадорлигини ошириш ва маҳаллаларда манзилли профилактик чора-тадбирлар тизимини самарали жорий этиш орқали жиноятчиликни кескин камайтириш, ҳар бир маҳаллада криминоген вазиятга салбий таъсир этувчи омиллар билан ишлашнинг маҳаллалар кесимида ҳар чораклик манзилли чора-тадбирларини белгилаш ҳамда уларнинг маҳалла-туман-вилоят даражасида ижроси учун бевосита масъул раҳбарларни бириктириш, амалга оширилган тадбирлар самарадорлиги юзасидан қатъий сўров тизимини йўлга қўйиш бўйича мутасаддиларга аниқ вазифалар ва кўрсатмалар берилди.
Шунингдек, тезкор-хизмат фаолияти самарадорлигини ошириш, ҳуқуқбузарликлар профилактикасини кучайтириш ҳамда келгусида жиноят ва ҳуқуқбузарликларнинг олдини олишга қаратилган 2026 йил учун устувор вазифалар белгиланди.
Таъкидланганидек, айни кунда маҳаллаларда хавфсиз муҳитни яратиш йўналишида яхлит манзилли ишлаш тизимини жорий этишга қаратилган чора-тадбирлар таркибида вилоят ҳокимлиги, прокуратура, ички ишлар, соғлиқни сақлаш, оила ва хотин-қизлар, адлия бошқармалари масъул ходимларидан иборат махсус ишчи гуруҳи томонидан амалга оширилади ва мувофиқлаштириб борилади.
Семинар интерактив руҳда ўтиб, иштирокчиларни қизиқтирган саволларга мутахассислар томонидан батафсил ҳуқуқий тушунтиришлар берилди. Ўтказилаётган ўқув машғулотлари маҳаллаларда криминоген вазиятни барқарорлаштириш, аҳоли тинчлиги ва осойишталигини ишончли таъминлаш ҳамда жиноятчиликка қарши курашишда давлат органлари ва жамоатчилик ҳамкорлигини мустаҳкамлашга хизмат қилади.
Вилоят ҳокимлиги матбуот хизмати