Олот: маҳаллаларда хавфсиз муҳитни таъминлашнинг долзарб масалалари муҳокама қилинди
2026-01-22 16:30:00 / Янгиликлар
Олот туманида бўлиб ўтган семинар жамоат хавфсизлигини таъминлаш, ҳуқуқ-тартиботни мустаҳкамлаш ва профилактика ишлари самарадорлигига бағишланди. Тадбир Ўзбекистон Республикаси Президентининг шу йил 5 январдаги “Республика маҳаллаларида хавфсиз муҳитни яратиш йўналишида яхлит ишлаш тизимини жорий этишга қаратилган қўшимча чора-тадбирлар тўғрисида”ги ПҚ-1 ва ПҚ-2-сонли қарорларининг чекка тумандаги ижросига алоҳида эътибор қаратилди. Бу қарорлар жиноятчиликка қарши курашда тизимли, аниқ ва комплекс ёндашувни кучайтиришга қаратилгани билан аҳамиятлидир.
Йиғилишда, ижтимоий профилактика самарадорлигини ошириш ва маҳаллаларда манзилли профилактик чора-тадбирлар тизимини самарали жорий этиш орқали жиноятчиликни кескин камайтириш, ҳар бир маҳаллада криминоген вазиятга салбий таъсир этувчи омиллар билан ишлашнинг маҳаллалар кесимида ҳар чораклик манзилли чора-тадбирларини белгилаш ҳамда уларнинг маҳалла-туман-вилоят даражасида ижроси учун бевосита масъул раҳбарларни бириктириш, амалга оширилган тадбирлар самарадорлиги юзасидан қатъий сўров тизимини йўлга қўйиш бўйича мутасаддиларга аниқ вазифалар ва кўрсатмалар берилди.
Семинар машғулотида республика Ички ишлар вазирлиги академияси масъул ходими Жасур Ўроқов, вилоят Ички ишлар бошқармаси бошлиғининг биринчи ўринбосари Эркин Сафаров, вилоят ИИБ жамоат хавфсизлиги хизмати бошлиғи Каромат Ражабов, туман ҳокими Наргиза Неъматовалар муҳокама қилинган ҳар бир йўналиш бўйича йиғилишда қатнашган ҳудуддаги 35 та маҳалла “еттилиги” масъуллари, маҳаллий ҳокимлик ва прокуратура, ички ишлар ходимларига батафсил тушунтиришлар ва амалий тавсияларини бердилар.
Мазкур семинар маҳаллаларда жиноятчиликнинг олдини олиш, аҳоли тинчлиги ва хавфсизлигини таъминлашга қаратилган тизимли ишларнинг самарадорлигини оширишга хизмат қилиши билан аҳамиятли эканлиги таъкидланди. Аҳоли билан бевосита ва очиқ мулоқот қилиш, одамларни қийнаб келаётган тизимли муаммоларни аниқлаш ҳамда уларни қисқа муддатларда ҳал этиш, шунингдек, ижтимоий профилактика самарадорлигини ошириш, оила ва никоҳ муносабатлари, аёллар ва ёшлар жиноятчилигининг асл сабабларини илмий асосда таҳлил қилиш, жамоатчилик ишончини мустаҳкамлаш зарурлиги алоҳида қайд этилди.
Семинарда туман ИИБ раҳбарияти, шахсий таркиби, ҳудуддаги маҳаллалар “еттилиги” ва ҳамкор ташкилотлар вакилларига юқоридаги қарорлар ижроси устидан қатъий назорат тизими жорий этилиши маълум қилинди. Жиноятларни ҳисобдан яшириш ва сохта ҳисоботлар киритиш қатъиян тақиқланиши, самарали ишлаган ходимлар эса пул мукофотлари, давлат мукофотларига тавсия этилиши ва жамоатчилик олдида эътироф этиш орқали рағбатлантирилиши белгиланди. Бу эса маҳаллаларда ҳақиқий хавфсиз муҳит яратиш ва фуқароларнинг давлат органларига бўлган ишончини янада оширишга хизмат қилади.
Вилоят ҳокимлиги матбуот хизмати