Когон: “Ҳар бир оила – тадбиркор” дастури доирасида Геофизика маҳалласида яна бир муваффақиятли лойиҳа
2026-01-09 18:45:00 / Янгиликлар
Когон туманида аҳоли бандлигини таъминлаш, оилавий тадбиркорликни ривожлантириш ҳамда аҳолининг даромад манбаларини кенгайтириш борасида амалга оширилаётган чора-тадбирлар ўз самарасини бермоқда. Хусусан, “Ҳар бир оила—тадбиркор” дастури доирасида ўнлаб ташаббускор фуқаро ўз фаолиятини йўлга қўйиб, барқарор даромад манбаига эга бўлмоқда.
Шундай тадбиркорлар қаторида “Геофизика” маҳалла фуқаролар йиғини, Наврўз кўчасида яшовчи ёш тадбиркор Жавоҳир Эшонқуловни ҳам эътироф этиш лозим. У мазкур дастур доирасида ҳокимнинг маҳалладаги ёрдамчиси тавсияси асосида 10 миллион сўм миқдорида имтиёзли кредит маблағини олиб, бу сармоя ҳисобидан қандолат маҳсулотлари ишлаб чиқариш учун зарур асбоб-ускуналарни харид қилди ҳамда ўз хонадонида ишлаб чиқариш цехи фаолиятини йўлга қўйди.
Айни кунда ёш ишбилармон томонидан уй шароитида 10 турга яқин турли хил қандолат маҳсулотлари тайёрланмоқда. Ширинликлар сифати ва харидоргирлиги туфайли қисқа фурсатда доимий мижозларига эга бўлди. Буюртма кўпайиб, иш ҳажми ошгани сайин қандолатпаз ва унинг оила аъзолари қўли-қўлига тегмаяпти. Албатта, меҳнатга яраша моддий манфаатдорлик ҳам ошмоқда.
Мазкур ташаббус Жавоҳир Эшонқулов ва унинг оила аъзоларини ҳам даромадли қилиб, турмуш тарзини яхшилади. Шу қаторда бу каби ташаббуслар ҳудудда ривожлантирилаётгани аҳоли бандлигини таъминлаш, маҳалла ва қишлоқ одамлари турмуши сифатини оширишда муҳим қадам бўлмоқда.
Вилоят ҳокимлиги матбуот хизмати