Бухоро вилояти ҳокимлиги

Ҳар қандай ота-она ўғил-қизи бу қулайликлардан баҳраманд бўлишини хоҳлайди, албатта. Таҳлиллардан кўринишича, 2020 йил охирида туманда болалар боғчаси сони 96 тани ташкил қилган бўлса, бугунга келиб ҳудудда жами давлат ва нодавлат мактабгача таълим ташкилоти сони 178 тага етказилган бўлиб, шундан 46 таси давлат мактабгача таълим ташкилоти ва 128 таси оилавий уй боғчаси, 4 таси эса давлат хусусий шериклигидаги муассаса ҳисобланади. Мактабгача таълимга жалб этилган болалар сони бугунга келиб 9400 нафардан оширилгани ҳолда, умумий қамров даражаси 92 фоизни ташкил этмоқда.

Куни кеча, айни янги йил байрами олдидан туманнинг “Ўғлон” маҳалла фуқаролар йиғинидаги 35-сонли давлат мактабгача таълим ташкилотининг янги биноси фойдаланишга топширилди. Мазкур икки қаватли, 120 ўринга мўлжалланган замонавий бино барча қулайликларга эга бўлиб, болажонлар учун қувонч ва билим маскани бўлиб хизмат қилади.

Иншоотни фойдлаланишга топшириш тадбирида туман ҳокимлиги, жамоатчилик вакиллари, маҳалла фаоллари, ота-оналар ҳозир бўлдилар. Сўзга чиққанлар маскан қурилишида жонбозлик кўрсатган бинокорларга ўз миннатдорликларини изҳор қилишиб, баркамол авлод вакиллари эртанги кунига катта ишонч билдирдилар. Шундан сўнг бино рамзий алвон лентаси қирқилгач, тадбирда йиғилганлар болалар боғчасида жажи авлод вакиллари учун яратилган шарт-шароит ва қулайликлар билан яқиндан танишдилар.  

Тадбир сўнгида нуронийлар, боғча жамоаси ва ота-оналар биргаликда давлат мактабгача таълим ташкилотининг янги биноси ҳудудида манзарали дарахт ниҳолларини ўтқаздилар. 

Умуман, айни кунда туман мактабгача таълим тизимида 1 минг 400 дан ошиқ ишчи-ходим фаолият кўрсатаётган бўлса, уларнинг 518 нафари малакали тарбиячи, 73 нафари олий маълумотли педагоглардир. Қиёсий олганда, сўнгги уч йилда ҳудуддаги давлат мактабгача таълим ташкилотидан 15 таси мукаммал таъмирдан чиқарилиб, талаб даражасида жиҳозланган ва болажонлар ихтиёрига топширилган. 

Вилоят ҳокимлиги матбуот хизмати