Шофирконда ҳам стоматология соҳаси ривожланиб, аҳолига сифатли ва кафолатланган тиббий хизмат кўрсатилмоқда
2025-12-20 16:40:00 / Янгиликлар
Ҳозирда туман тиббиёт бирлашмаси тасарруфидаги муассасаларда жами 18,5 штат бирлигида малакали стоматолог врач фаолияти йўлга қўйилгани мавжуд имкониятдан далолат, албатта. Жумладан, кўп тармоқли марказий поликлиникада 4 та, оилавий поликлиникаларда 8 та ҳамда оилавий шифокорлик пунктларида 6,5 та штат бирлиги асосида стоматолог врач аҳолига бирламчи тиббий ёрдам кўрсатмоқда.
Асосийси, барча стоматологик кабинетлар замонавий тиббий технологиялар, янги авлод стоматологик қурилмалар, стерилизация воситалари ва сифатли пломба ашёлари билан тўлиқ жиҳозланган. Бу эса ташхис қўйиш ва даволаш жараёнларини тезкор, хавфсиз ҳамда самарали амалга ошириш имконини бермоқда.
Давлат томонидан жорий этилган “Кафолатланган тиббий хизматлар пакети” доирасида туман аҳолиси, айниқса, ижтимоий ҳимояга муҳтож оилалар аъзолари учун стоматологик хизматлар бепул кўрсатилмоқда.
Жумладан, 18 ёшгача бўлган болалар, ҳомиладор аёллар, 13 турдаги ижтимоий аҳамиятга эга касалликларга чалинган беморлар, нафақада бўлган фуқаролар стоматологик бирламчи тиббий хизматлардан бепул фойдаланиш ҳуқуқига эга. Бу эса болалар ва кексалар саломатлигини муҳофаза қилиш, касалликларни эрта аниқланиши ва асоратлари олдини олишда муҳим аҳамиятга эга.
Мазкур харажатлар “Аёллар дафтари”, “Ёшлар дафтари” ва “Саховат ва кўмак” жамғармалари маблағлари ҳисобидан молиялаштирилмоқда. Соғлиқни сақлаш тизимини ислоҳ қилиш доирасида 2026 йил 1 январдан бошлаб давлат тиббий суғуртаси механизмлари жорий этилаётган ҳудудларда аҳолига режалаштирилган стационар тиббий ёрдам электрон навбат асосида бепул кўрсатилади. Бунда солиқ тўловчилар, вояга етмаганлар, талабалар, ҳомиладор аёллар, ишсизлар, пенсия ёшидагилар ҳамда “Ижтимоий ҳимоя ягона реестри” орқали кам таъминланган деб топилган фуқаролар бу имкониятдан фойдаланишлари мумкин.
Шунингдек, болаликдан ногиронлиги бўлган шахслар, етим болалар, байналминалчи аскарлар ҳамда эндокрин, сил ва онкологик касалликларга чалинган беморларга стоматологик хизматлар бўйича имтиёзли тиббий ёрдамлар кўрсатиб келинмоқда.
Умуман, айни кунда Шофиркон туман тиббиёт бирлашмасида стоматологик хизматлар замон талаблари асосида, аҳолига яқин ташкил этилган. Шунингдек, туман марказидаги “Marjona” ва бошқа хусусий стоматологиялар фаолияти бу борада соғлом рақобат ва сифатли тиббий хизмат кўрсатиш муҳитини шакллантирмоқда.
Вилоят ҳокимлиги матбуот хизмати