Бухоро вилояти ҳокимлиги

Маълумот ўрнида таъкидлаш жоизки, айни пайтда Бухоро вилоятидаги 151 та умумтаълим мактабида 216 та инклюзив таълим синфлари ташкил этилган бўлиб, уларда 280 нафар алоҳида таълимга эҳтиёжи бўлган ўқувчи қамраб олинган. Бу кўрсаткичлар ҳудудда инклюзив таълимни босқичма-босқич жорий этиш ва таълимда тенг имкониятларни таъминлаш йўлида амалга оширилаётган изчил ислоҳотларнинг амалий натижасидир.

Эътироф этиш жоизки, “Vision 2030 – Ўзбекистонда таълим имкониятларини кенгайтириш: ахборот-коммуникация технологиялари ва рақамли таълим орқали сифатли ва инклюзив таълим натижаларига эришиш” ҳамда “Ишонч 2030” лойиҳалари Бухоро вилоятида нафақат умумтаълим муассасалари, балки педагог кадрлар салоҳиятини оширишга хизмат қилаётган муҳим ташаббуслардандир. Хусусан, “Ишонч 2030” лойиҳаси доирасида Ромитан туманидаги 1-сонли, Когон шаҳридаги 3-сонли ҳамда Бухоро шаҳридаги 45-сонли умумтаълим мактабларида инклюзив таълим муҳитини яратиш бўйича кенг кўламли ишлар амалга оширилди.

Ташриф Ромитан туманидаги 1-умумтаълим мактабидан бошланди. Меҳмонлар бу ерда ташкил этилган инклюзив таълим синфлари ва STEM лабораторияси фаолияти билан яқиндан танишиб, алоҳида таълимга эҳтиёжи бўлган ўқувчилар учун яратилган шарт-шароитларни кўздан кечирдилар. Ота-оналар ва мактаб жамоаси билан бўлиб ўтган очиқ ва самимий мулоқотлар инклюзив таълимнинг ижтимоий аҳамиятини янада мустаҳкамлади.

Шундан сўнг меҳмонлар Бухоро вилоят педагогик маҳорат марказида “Ишонч” жамғармасининг “Юқори сифатли ва инклюзив таълим натижаларига эришиш учун ахборот-коммуникация технологиялари ва рақамли таълимдан фойдаланиш” лойиҳаси доирасида ташкил этилган анжуманда иштирок этишди. 

Тадбирни вилоят ҳокими Ботир Зарипов кириш сўзи билан очиб берди. 

-Бугунги учрашувимиз юртимизда таълим ва соғлиқни сақлаш соҳаларини янада ривожлантириш, инклюзив муҳитни кучайтириш ҳамда рақамли технологиялар орқали сифатли хизматлар кўрсатишга қаратилган муҳим ташаббуслар муҳокамасига бағишлангани билан алоҳида аҳамият касб этади.Айни пайтда амалга оширилаётган “Vision 2030 – Ўзбекистонда таълим имкониятларини кенгайтириш: ахборот-коммуникация технологиялари ва рақамли таълим орқали сифатли ва инклюзив таълим натижаларига эришиш” ҳамда “Ишонч 2030” лойиҳалари вилоятимизда таълим ва ижтимоий инфратузилмани янги босқичга олиб чиқишга хизмат қилмоқда,-деди Ботир Зарипов.

Сўз – шунчаки ният эмас, у аниқ амалий ишлар билан мустаҳкамланса, натижа беради. Шу маънода, “Ишонч 2030” лойиҳаси доирасида Бухоро вилоятидаги туғруқ комплекслари бир қатор замонавий тиббий ускуналар билан таъминланди. 
Биргина шу амал оналик ва болаликни муҳофаза қилиш, тиббий хизмат сифатини оширишга хизмат қилмоқда. Жорий ҳолатда вилоятида 130 та мактабларда инклюзив таълим муҳити, шарт-шароитлари тўла яратилган бўлиб, “Ишонч 2030” лойиҳаси доирасида Ромитан туманидаги 1-сонли, Когон шаҳридаги 3-сонли ҳамда Бухоро шаҳридаги 45-сонли умумтаълим мактабларида инклюзив таълим муҳитини яратиш бўйича кенг кўламли ишлар бажарилди. 

Мазкур намуна асосида босқичма-босқич қолган 454 та мактабда ҳам тўлиқ инклюзив таълим муҳити яратилиши режалаштирилган. Тадбирда сўзга чиқаанлар томонидан ўқитувчиларнинг касбий компетенцияларини ривожлантириш, рақамли ва инклюзив таълим методларини жорий этиш масалаларига алоҳида эътибор қаратилди.

Шу куни меҳмонлар педагогик маҳорат маркази фаолияти билан яқиндан танишишди. 
Шунингдек, оммавий ахборот воситалари вакиллари иштирокида матбуот анжумани ҳам бўлиб ўтди. Анжуманда лойиҳа натижалари, келгусидаги режалар юзасидан батафсил маълумотлар берилиб, журналистларнинг саволларига атрофлича жавоблар қайтарилди.

Шунингдек, делегация Бухоро шаҳридаги 45-сонли умумтаълим мактабида бўлиб, мактаб бўйлаб экскурсия давомида рақамли, СТЕМ ва инклюзив синфлар фаолияти билан яқиндан танишди. Мактаб директори ва ўқитувчилари билан ўтказилган суҳбатлар жараёнида яратилган таълим муҳити, эришилган натижалар ҳамда истиқболдаги режалар муҳокама қилинди.

Вилоят ҳокимлиги матбуот хизмати