Ўзбекистон Илмий-техника ва тиббиёт ҳужжатлари миллий архивида “Профессор Баҳодиров Мажидхон – ўзбек тупроқшунослик фани тараққиётининг илмий мерослари ва унинг ҳозирги глобал замондаги аҳамияти” мавзусида илмий-амалий семинар ўтказилди.
2025-12-09 16:30:00 / Янгиликлар
5 декабрь — “Бутунжаҳон тупроқ куни” муносабати билан Ўзбекистон Илмий-техника ва тиббиёт ҳужжатлари миллий архивида “Профессор Баҳодиров Мажидхон – ўзбек тупроқшунослик фани тараққиётининг илмий мерослари ва унинг ҳозирги глобал замондаги аҳамияти” мавзусида илмий-амалий семинар ўтказилди.
Семинарда ЎзИИТҲ МА сақловидаги шахсий фонд асосида ўз даврининг етук олими ва зиёлиси, Ватани учун тинмай илмий изланишлар олиб борган ҳамда педагогик фаолияти орқали уни юксалтиришга муносиб ҳисса қўшган, ёшларни ватанпарварлик руҳида тарбиялашда ҳамда тупроқшунослик ва шарқшунослик фанлари ривожланишига улкан ҳисса қўшган “Ўзбекистон Республикасида хизмат кўрсатган фан арбоби”, профессор Мажидхон Баҳодировнинг ҳаёт йўли, ижоди, илм-фан ривожига қўшган ҳиссаси ва илмий изланишлари ҳақида сўз юритилди.
Семинарда Тошкент давлат аграр университети ҳамда Тупроқшунослик ва агрокимё илмий-тадқиқот институти раҳбарияти ва профессор-ўқитувчилари, “М. Баҳодиров” номидаги стипендиатлар, Мажидхон Баҳодировнинг оила аъзолари, авлодлари ва «Беруний» фуқаролар йиғини фаоллари, архивчилар ва ОАВ иштирок этишди.
Семинар ишида ўзбек тупроқшунос олими “Мажидхон Баходиров” шахсий фонди архив ҳужжатлари кўргазманинг очилиши билан бошланиб, архив бўйлаб экскурция ўтказилди. Тупроқшунослик ва агрокимё илмий-тадқиқот институти томонидан тақдим этилган республика ҳудудлари тупроқ намуналари кўргазмага қўйилди.
Семинарда Тупроқшунослик ва агрокимё тадқиқот институтининг бўлим мудири, қишлоқ хўжалиги фанлари доктори, профессор Р. Курвантаев, Тошкент давлат аграр университети ўқитувчиси, биология фанлари доктори, профессор Н. Раупова, Тошкент давлат аграр университети ўқитувчиси, қишлоқ хўжалиги фанлари доктори, профессор Б. Болтаев, Ўзбекистон Илмий-техника ва тиббиёт ҳужжатлари миллий архиви бўлим мудири, тарих фанлари бўйича фалсафа доктори (ПҳД) С. Мухамедова ҳамда талабалар ўзларининг илмий маърузалари билан иштирок этдилар.
Тадбирда олим Мажидхон Баҳодировнинг фарзандлари Нажиба ая Баҳодирова, профессор Роиқ Баҳодировлар ва авлодлари М. Баходировнинг шахсий сифатлари ва фарзандларнинг тарбиясига бўлган муносабати ҳақида сўзлаб бердилар. Хусусан, қизлари Н. Баходированинг отаси М. Баходиров ҳақидаги самимий ва таъсирли хотиралари, шу билан бирга инсон ҳаёт йўлини безаб турувчи ибратли ҳикоялари тингловчиларда илм-фанга бўлган қизиқишларини оширди. Ўғли профессор Р. Баходировнинг чиқишида эса илмий фаолиятнинг юқори чўққисига эришишда отаси М. Баходировнинг талабчанлиги ва қўйган тамал тоши билан белгиланиши фахр билан қайд этиб ўтилди. Илмий семинарда машҳур ёзувчи Мирзакалон Исмоилийнинг набираси санъатшунослик фанлари бўйича фалсафа доктори К. Сагдуллаев ҳам иштирок этиб, ўзининг илиқ фикрлари билан ўртоқлашди.
Тадбирда Тошкент давлат аграр университети раҳбарияти томонидан Ўзбекистон илмий-техника ва тиббиёт ҳужжатлари миллий архивига ўзаро ҳамкорлик ва илм-фан соҳасидаги тарғибот ишларидаги муваффақиятлари учун эсдалик совғаси топширилди. Архив томонидан эса ҳамкор ташкилотлар, М. Баходировнинг оила аъзолари ва барча ташриф буюрувчилар учун эсдалик совғалари топширилди.
Семинардан олинган илмий маълумотлар, хулосалар, муҳокамалар, савол-жавоблар билан семинар иши якунланди. Семинар иштирокчилари томонидан илм-фан фидойилари бўлган олимларнинг шахсий фондларини архивга доимий сақловга қабул қилиш муҳимлигини эътироф этилди.