Suv – gavhar, ilm – zafar,

Havas qilgay yosh-qari.

Suvni aziz bilgan, ey

Elning mard o‘g‘lonlari.

 

Suvsiz yer – jonsiz vujud

Mardsiz el – manzilsiz yo‘l.

Manzilga yetmoqqa ham

Sizday yigitlar mas’ul.

 

Muammoga yechim tutgan

Asilbek, Pahlavonlar.

Ilm yo‘lida mayoq bo‘lgan

Ham ustoz Sohibxonlar

 

Ikki o‘zbek o‘g‘lon bermish

Kelajakning ta’birin.

Baraka suv – yomg‘ir suvin

Qayta ishlash tadbirin.

 

Prezident maktabining

Nomin ulug‘lab kelgan.

Shayx Nohayon huzurida

Yurt sha’nin baland qilgan.

 

Suvchi – zargar, degan el

E’zozlar, tutgay ulug‘.

Zargarning qadrin bilgan

Shu elga ming bor qulluq.

 

Ilmni baland tutgan,

Nomingizga sharaf-sha’n.

Yuksalar, obod bo‘lar

Sizlar bilan bu Vatan.

 

***

 

Birlashgan Arab Amirliklari poytaxti Abu-Dabi shahrida “Zayed Sustainability Prize” tanlovida Toshkent shahridagi Prezident maktabi o‘quvchilari o‘z ixtirolari bilan g‘olib deb topildi. Ularga mukofotni BAA Prezidenti Shayx Muhammad bin Zoid Ol Nahayon topshirdi.

Taqdirlash marosimida Prezidentimiz Shavkat Mirziyoyev ishtirok etib, g‘oliblarni g‘alaba bilan qizg‘in tabrikladi.

Tanlovda Prezident maktabi o‘quvchilari Pahlavon G‘ulomov va Asilbek Ashrapov hamda ularning ustozi Sohibxon Azizovning yomg‘ir suvini ichishga yaroqli darajagacha qayta ishlash loyihasi "Global o‘rta maktablar" nominatsiyasi bo‘yicha g‘alabani qo‘lga kiritgan.

Kuni kecha Toshkentda ikki nafar o‘quvchining ota-onasi va ustoziga Prezident nomidan mukofotlar topshirildi. Shuningdek, ularga BYD avtomobillari ham sovg‘a qilindi.

G‘oliblarni chin dildan tabriklab, ularning kelgusi o‘qish va ishlarida ulkan muvaffaqiyatlar tilaymiz!

 

Suv xo‘jaligi vazirligi Axborot xizmati.