ONA TILIMIZNI ASRAB-AVAYLASh VA QADRLASh UChUN BARChAMIZ BIRLAShIShIMIZ KERAK
2024-10-19 12:45:00 / Yangiliklar
Inson uchun kindik qoni tomgan Vatani, dunyoga keltirib voyaga yetkazgan ota-onasi qanchalik aziz va mukarram bo‘lsa, uning o‘zligi va ma’naviy olamini belgilaydigan ona tili ham shunchalik qadrli va mo‘tabardir.
Xalqimiz tafakkurining tiniq ko‘zgusi bo‘lgan bu bebaho xazinani asrab-avaylash va rivojlantirish bugungi kundagi eng sharafli vazifalarimizdan biridir.
Ma’lumotlarga qaraganda, bugungi kunda jahon miqyosida
50 millionga yaqin kishi o‘zbek tilida so‘zlashmoqda. Ko‘plab mamlakatlarda bu go‘zal va jozibali til katta ishtiyoq bilan o‘rganiladi.
Ulug‘ mutafakkir Mir Alisher Navoiy bobomizning: “Tilga e’tibor – elga e’tibor”, degan dono o‘gitlariga amal qilgan holda, yurtimizda til masalasida olib borilayotgan davlat siyosati inson qadrini ulug‘lashga qaratilgan tub islohotlarimizga har tomonlama uyg‘un va hamohangdir.
Bugun Suv xo‘jaligi vazirligida “Qadring baland bo‘lsin, Ona tilim!” mavzusida madaniy-ma’rifiy tadbir o‘tkazildi. Uni vazirning birinchi o‘rinbosari Timur Butunbayev ochib berar ekan, so‘nggi yillarda mamlakatimizda o‘zbek tilini rivojlantirish, uning hayotimizdagi o‘rni va ta’sirini oshirish borasida yangi bosqich boshlanganligini ta’kidladi.
Suv xo‘jaligi vazirligi tizimida mehnat qilayotgan ishchi-xodimlar ham milliy o‘zligimiz va g‘ururimiz timsoli bo‘lgan ona tilimizni asrab-avaylash va rivojlantirishdek sharafli ishga munosib hissa qo‘shib kelayotgani e’tirof etildi.
Tadbirda O‘zbekiston Yozuvchilar uyushmasi a’zosi, olima, falsafa fanlari doktori, “Mehnat Shuhrati” ordeni sohibasi, “O‘zbekiston Respublikasida xizmat ko‘rsatgan yoshlar murrabiysi” Jamila Toshpo‘latovna Shermuhamedova, Alisher Navoiy nomidagi Toshkent davlat o‘zbek tili va adabiyoti universiteti ilmiy xodimi Mavluda Oripova, O‘zbekiston Fanlar akademiyasi O‘zbek tili, adabiyoti va folklor instituti katta ilmiy xodimi Abdumannon Hasanovning chiqishlari tinglandi.
Ayniqsa, Jamila Shermuhammedovaning “Ona tilimizni himoya qilish, asrab-avaylash va qadrlash uchun bugun barchamiz birlashishimiz kerak” degan o‘ta haroratli fikrlarini ishtirokchilar qizg‘in qo‘llab-quvvatladi.
Axborot xizmati