Finanslıq texnologiyalardı rawajlandırıw ilajları dodalandı

Búgingi kúnde dúnyada finanslıq texnologiyalar bazarı tez pát penen rawajlanbaqta. Onıń kólemi bıyıl 300 milliard dollardan, 2030-jılǵa barıp, 600 milliard dollardan artıwı kútilmekte.

Elimizde de bul baǵdarda úlken imkaniyatlar bar. 2018-jılı FinTech kárxanaları 24 bolǵan bolsa, házirgi kúnde 103 ke jetken.

Bıyıl jergilikli kárxanalarımız 260 million dollardan aslam sırt el investiciyasın tartqan. Bul kórsetkish ótken jılǵa salıstırǵanda 4 esege kóp.

Ózbekstan Prezidentiniń isbilermenler menen ashıqtan-ashıq sóylesiwinde 1 mıń startaptı qollap-quwatlaw, “Open banking” sistemasın engiziw, finanslıq texnologiyalardı rawajlandırıw boyınsha bes jıllıq strategiya islep shıǵılatuǵını aytılǵan edi.

Prezentaciyada juwapkerler bul baǵdardaǵı rejeler hám usınıslar boyınsha málimleme berdi.

Strategiyanı puqta islep shıǵıw ushın, bárinen burın, normativlik-huqıqıy baza, finanslıq texnologiyalardıń házirgi jaǵdayı, infrastruktura hám kadrlar máselesi tallanbaqta. Singapurlı ekspertler tartılıp, xalıqaralıq tájiriybe úyrenilmekte. Usı tiykarda bul tarawdaǵı milliy principler qáliplestiriledi, institucionallıq arxitektura hám uyımlararalıq birge islesiw tártibi belgilenedi. Maqset turaqlı, inklyuziv hám básekige shıdamlı finanslıq xızmetler ekosistemasın jaratıw bolıp tabıladı.

Búgingi kúnde finans bazarın jasalma intellekt hám blokcheyn texnologiyalarısız rawajlandırıw múmkin emes. Tallawlarǵa bola, bular arqalı banklerdiń dáramatın 20 procentke, finanslıq xızmetlerdiń kólemin 30 procentke arttırıp, qáwip-qáterlerdi 15 procentke azaytıw múmkin.
Mámleketimiz basshısı banklerdiń texnologiyalıq imkaniyatların keńeytip, sanlı xızmetlerdi kóbeytiw boyınsha kórsetpe berdi.

Tarawda nátiyjelilik normaların anıqlaw hám basqarıw maqsetinde Oraylıq bankte Fintex ofisiniń jumısın jolǵa qoyıw boyınsha wazıypalar belgilendi. Startaplardıń akseleraciyası, jańa ideyalar hám investiciyalarǵa sharayat jaratıw ushın innovaciyalıq xab shólkemlestiriliwi maqullandı. Bul ilajlar keleshekte Ózbekstannıń regionallıq fintex orayına aylanıwına xızmet etedi.