Ayrıqsha jaǵdaylarǵa operativ juwap beriw hám suw saqlaǵıshlardıń qáwipsizligin támiyinlew ilajları dodalandı

Qalalardıń keńeyiwi, texnologiyalıq rawajlanıw hám klimattıń ózgeriwi qutqarıw xızmetiniń aldına jańa wazıypalar qoymaqta. Házirgi waqıtta ayırım órt-qutqarıw bólimleriniń jaylasıwı, imaratları hám texnikası operativ járdem kórsetiw talaplarına tolıq juwap bermeydi.

Mámleketimiz basshısı sistemanı jańalawda tiykarǵı ólshem insan ómirin saqlap qalıw bolıwı kerek ekenligin atap ótti. Bul ushın “altın minut” qaǵıydasın ámeliyatqa engizip, qala aymaqlarında qutqarıwshılardıń jetip keliw waqtın 5-7 minutqa, qala oraylarınan tıs aymaqlarda bolsa 15-20 minutqa túsiriw wazıypası qoyıldı.

Xalqı 250 mıńnan aslam rayon hám qalalardaǵı 25 órt-qutqarıw bólimin qayta shólkemlestiriw hám zamanagóy texnika menen támiyinlew rejeleri haqqında málimleme berildi. Sonday-aq, qıyın sharayatlarda isleytuǵın “Madad” milliy kóp tarmaqlı arnawlı qutqarıw orayı, aviaciya-qutqarıw bólimi hám ayrıqsha jaǵdaylardı basqarıw boyınsha ilimiy-izertlew orayın shólkemlestiriw usınıs etildi.

“112” birden-bir dispetcherlik xızmetiniń jumısın jetilistiriw, múrájat kelip túsken waqıttan onıń orınlanıwına shekemgi processti baqlaw, tiyisli xızmetlerdiń arasında málimleme almasıwın kúsheytiw máselelerine de itibar qaratıldı. Tarawda sanlı texnologiyalar hám jasalma intellekt imkaniyatlarınan keńirek paydalanıw zárúr ekenligi atap ótildi.

Suw saqlaǵıshlarda qutqarıw xızmetin keńeytiw zárúr ekenligi de atap ótildi. Ámeldegi 56 suw saqlaǵıshtan tek tórtewinde bunday xızmet jolǵa qoyılǵan. Sonlıqtan, “Karkidon” suw saqlaǵıshı mısalında professional qutqarıw sistemasın shólkemlestiriw usınısı bildirildi. Qutqarıwshılardı tayarlaw texnikumında dual bilimlendiriw tiykarında qutqarıwshı-ǵavoshlardı tayarlaw, turizm obektleriniń xızmetkerlerin ayrıqsha jaǵdaylarda háreket etiw hám birinshi járdem kórsetiwge oqıtıw rejelestirilmekte.

Suw saqlaǵıshlardan turizm maqsetinde paydalanıw imkaniyatları da kórsetip ótildi. Házirgi waqıtta bes suw saqlaǵıshta turizm shólkemlestirilgen, jáne 25 inde bunday xızmetlerdi jolǵa qoyıw imkaniyatı bar. Bul aymaqlarǵa investiciya tartıw, jańa jumıs orınların jaratıw hám turistler aǵımın kóbeytiwge xızmet etiwi múmkin.

Onda qáwipsizlik talapları ústin bolıwı atap ótildi. Turistlik xızmetlerdi sertifikatlaw, isbilermenlerdiń professional qutqarıw strukturaları menen shártnama dúziwin májbúriy etip belgilew, dem alıw orınların qutqarıw qayıqları, baqlaw minaraları hám suw tereńligin kórsetiwshi belgiler menen úskenelew usınıs etildi.

Suw saqlaǵıshlardıń átirapında turizm xızmetlerin shólkemlestirgen isbilermenlerdi qollap-quwatlaw ilajları da usınıldı. Olarǵa 2029-jıl 1-oktyabrge shekem jer hám múlk salıqlarınıń yarımın tólew, GPS, qutqarıw hám qáwipsizlik úskeneleri ushın bajıxana tólemlerin 120 kúnge keshiktirip yamasa bólip tólew imkaniyatın beriw názerde tutılmaqta. Bul aymaqlardaǵı jer uchastkaların satıwdan túsken qarjılardı sırtqı injenerlik tarmaqları hám jol infrastrukturasın rawajlandırıwǵa qaratıw usınıs etildi.

Sonday-aq, suw saqlaǵıshlardıń texnikalıq jaǵdayı hám qáwipsiz islewin támiyinlew boyınsha alıp barılıp atırǵan jumıslar haqqında málimleme berildi. Jigirma bes suw saqlaǵısh ornına shıǵıp úyrenilgen. Qáwipli ózgerislerdi erte anıqlaw ushın jergilikli eskertiw sistemaları, videobaqlaw, seysmologiyalıq úskeneler hám sanlı qadaǵalaw quralların keńirek engiziw ilajları kóriledi.

Prezentaciyanıń juwmaǵında mámleketimiz basshısı juwapkerlerge qutqarıw xızmetiniń jedelligin arttırıw, suw saqlaǵıshlarda professional qutqarıw xızmetin jolǵa qoyıw hám turizm obektlerinde qáwipsizlik talapların anıq belgilew boyınsha tapsırmalar berdi.