Aymaqlarda janılǵı-energetika tarawındaǵı jumıslardı sistemalı shólkemlestiriw wazıypaları belgilendi

Aldın usı tájiriybe tiykarında hár bir aymaqtan birewden saylap alınǵan 14 rayonda úlgi sistema jaratıw wazıypası qoyılǵan edi. Usı maqsette jumıslar “máhálle kesiminde” shólkemlestirilip, energetika tarawındaǵı mashqalalardı ornına shıqqan halda úyreniw hám mánzilli ilajlar kóriw jolǵa qoyıldı.

Bul 916 máhálle, 832 mıń shańaraq, 49 mıń isbilermenlik subekti hám 2,2 mıńnan aslam sociallıq taraw obektin qamtıp aldı. Hár bir máhálle boyınsha energetikalıq pasport hám energiya resurslarına talap balansı qáliplestirildi.

Nátiyjede birinshi márte máhálleler kesiminde talap hám imkaniyat arasındaǵı ayırmashılıq anıq esap-sanaq etildi. Sonıń ishinde, 265 máhállede 60 megavatt elektr quwatlılıǵı, 42 máhállede bolsa jılına 47 million kub metr tábiyiy gaz jetispewshiligi bar ekenligi anıqlandı. Házirgi waqıtta 207 máhállede quwatlıq rezervi bar.

Bunday qatnas keleshekte energiya resurslarına bolǵan talaptı aldınnan esaplaw hám zárúr infrastrukturanı óz waqtında tayarlaw imkaniyatın beredi.

Usı tiykarda elektr hám gaz tarmaqların jańalaw jumısları jedellesti. 14 rayonda 5 mıń 695 transformator, 6,9 mıń kilometr elektr tarmaǵı, 242 kilometr gaz tarmaǵı hám 404 gaz bólistiriw qurılması ońlawǵa mútáj ekeni anıqlandı. Olardıń texnikalıq jaǵdayın jaqsılap, “jasıl” kategoriyaǵa ótkeriw jumısları baslandı.

Házirgi waqıtqa shekem 441 transformator, 1 mıń 134 kilometr elektr hám 88 kilometr gaz tarmaǵı, sonday-aq, 92 gaz bólistiriw qurılması ońlandı.

Aldınǵı jılları investiciyalıq baǵdarlamalar sheńberinde baslanǵan, biraq juwmaǵına jetkerilmegen obektlerdiń bir bólegi de paydalanıwǵa tapsırıldı.

Esap-sanaqlarǵa bola, kelesi bes jılda bul rayonlarda energiya resurslarına talap 49 procentke artıwı kútilmekte. Sonlıqtan, keleshekte iske túsiriletuǵın joybarlardı esapqa alǵan halda xalıqtı hám isbilermenlerdi energiya resursları menen isenimli jáne turaqlı támiyinlewge qaratılǵan bes jıllıq baǵdarlama islep shıǵıldı.

Onda 721 máhállede 2 mıń 261 transformator hám 7 mıń 449 kilometr elektr tarmaǵın, 200 máhállede bolsa 313 gaz bólistiriw qurılması hám 327 kilometr gaz tarmaǵın jańalaw belgilendi.

Bul jumıslardıń nátiyjesinde aymaqlarda qosımsha 1 mıń 300 megavatt ótkeriw quwatlılıǵınıń jaratılıwı názerde tutılǵan.
Sociallıq taraw obektlerindegi energiya tutınıwı da úyrenildi. Jámi 1 mıń 938 obekttiń energiya jumsalıwı tallanıp, nátiyjeliligi tómen bolǵan 226 sı “qızıl” kategoriyaǵa kirgizildi. Olardı energiya nátiyjeli sistemaǵa ótkeriw boyınsha baǵdarlama islep shıǵılıp, ámeliy jumıslar baslandı.

Bul ilajlar nátiyjesinde jılına 4,3 million kilovatt-saat elektr energiyası hám 2,1 million kub metr tábiyiy gazdi únemlew imkaniyatı jaratıladı.

Mámleketimiz basshısı 14 rayonda qollanılǵan usınday qatnas penen sheklenip qalmastan, onı respublikanıń barlıq rayonlarında engiziw zárúr ekenligin atap ótti.

Barlıq aymaqlarda jumıslardı “máhálle kesiminde” shólkemlestiriw, energetikalıq pasportlar hám energiya tutınıw balansın qáliplestiriw, tarmaqlardıń jaǵdayın mánzilli úyreniw jáne anıqlanǵan mashqalalardı basqıshpa-basqısh saplastırıw boyınsha juwapkerlerge tapsırmalar berildi.

Maqset – energetika tarawında “mashqala payda bolǵannan keyin onı saplastırıw” ámeliyatınan ” mashqalanı aldınnan anıqlaw, zárúr ilajlardı rejelestiriw hám onıń aldın alıw” sistemasına ótiw.

Májiliste Samarqand wálayatı aymaqlıq elektr tarmaqların basqarıwdı sırt el investorlarına beriw hám “Surxon – Puli-Xumri” joqarı kúshleniwli tarmaǵın qurıw joybarların jedellestiriw máseleleri de kórip shıǵıldı.