Sharwashılıq hám qusshılıqtı rawajlandırıw ilajları dodalandı

Elimizde xalıqtıń sanı hám turizm aǵımınıń ósiwi azıq-awqat ónimlerine bolǵan talaptı da arttırmaqta. Házirgi kúnde góshke bolǵan jıllıq talap 2 million 150 mıń tonnanı, óndiris kólemi bolsa 1 million 600 mıń tonnanı quramaqta.

Sol sebepli, prezentaciyada 2026-2028-jıllarda sharwashılıq ónimlerin islep shıǵarıw kólemin arttırıw boyınsha islep shıǵılǵan kompleksli ilajlar dodalandı.

Jumıs islemey atırǵan kárxanalardı tiklew, sharwashılıqqa qánigelesken rayonlardı qollap-quwatlaw, xalıqtıń úylerinde jeńil konstrukciyalı malxanalar qurıw hám jańa joybarlardı ámelge asırıw esabınan qosımsha 190 mıń tonna gósh islep shıǵarıw imkaniyatı bar ekenligi atap ótildi.

Sonıń ishinde, jumısı toqtap qalǵan 103 sharwashılıq kárxanasın salamatlandırıw rejelestirilgen. Olardıń qarızların restrukturizaciyalaw yamasa on jılǵa bólip tólew, ot-jem jetistiriw ushın jer maydanların ajıratıw hám násilli mallar menen támiyinlew usınıs etildi. Nátiyjede 33 mıń bas qaramal baǵılıp, jılına 12 mıń tonna gósh hám 40 mıń tonna sút islep shıǵarıw imkaniyatı jaratıladı.

Sharwashılıqqa qánigelesken 13 rayonda 75 mıń gektar ot-jem maydanınan nátiyjeli paydalanıw, kishi sharwashılıq joybarların qarjılandırıw, sút qabıllaw punktleri hám ot-jem satıw shaqapshaların shólkemlestiriw názerde tutılǵan.

Sonday-aq, xalıqtıń shańaraqlarında 20 sotıx maydanda jeńil konstrukciyalı 11 mıń qaramalxana qurıw hám olarda 421 mıń bas qaramal baǵıw rejelestirilgen.

Ulıwma bahası 3 trillion sum bolǵan 802 jańa joybar sheńberinde 68 mıń bastan aslam qaramal jáne 186 mıń bas qoy hám eshki baǵıw názerde tutılǵan. Bul joybarlar jılına qosımsha 20 mıń tonna gósh hám 120 mıń tonna sút islep shıǵarıw imkaniyatın beredi.

Qaraqalpaqstan mısalında sharwashılıq komplekslerin salamatlandırıw boyınsha jasalma intellekt járdeminde tayarlanǵan tallaw nátiyjeleri de kórip shıǵıldı. Úyrenilgen 20 komplekstiń qarızı 109,6 milliard sumdı qurap, olardıń yarımı joqarı qáwipli kategoriyaǵa kirgizilgen. Kópshilik obektlerde azıqlıq maydanları hám zárúr infrastruktura jeterli emes.

Sonnan kelip shıǵıp, qarız júgin jeńilletiw, ot-jem bazasın qáliplestiriw, komplekslerdi dáslep pilot tártibinde, keyin ala basqıshpa-basqısh iske qosıw hám násilli mallar menen támiyinlew boyınsha usınıslar bildirildi.

Mongoliyadan 150 mıń bas qoy, Qıtay hám Evropa mámleketlerinen 100 mıń bas násilli qaramal, Belarus Respublikasınan 2 mıń bas qaramal alıp keliw rejelestirilmekte. Bul arqalı jılına qosımsha 44 mıń tonna gósh islep shıǵarıw imkaniyatı jaratıladı.
Ulıwma, sharwashılıq tarmaǵın rawajlandırıw ushın 463 million dollar muǵdarında qarjı qaratıw názerde tutılǵan.

Xalıqtıń shańaraqların hám sharwashılıqqa qánigelesken máhállelerdi qollap-quwatlaw máselelerine ayrıqsha itibar qaratıldı. Respublikada 191 rayonda 2 mıń 407 sharwashılıqqa qánigelesken máhálle bolıp, olarda 823 mıń shańaraq hám 3,9 million xalıq jasaydı.

Bul shańaraqlarǵa arzan sharwa malların jetkerip beriw, sıyırlardı jasalma tuqımlandırıw, ot-jem támiynatı hám zooveterinariya xızmetlerin jaqsılaw, násilli buzawlardı identifikaciyalaw jáne olar ushın subsidiya ajıratıw usınıs etildi. Nátiyjede shańaraqlarda sharwa bas sanı hám ónimdarlıq artıwı, xalıq ushın qosımsha dáramat derekleriniń jaratılıwı kútilmekte.

Násilshilik tarawında 13 rayonda hár biri 200 bas qaramalǵa mólsherlengen xojalıqlar shólkemlestiriw, jılına 500 mıń bas sıyırdı tańlap alınǵan tuqım menen jasalma tuqımlandırıw hám embrion transplantaciyası texnologiyaların keńnen engiziw rejelestirilgen.

Prezentaciyada Ózbekstan sharwalar associaciyasın shólkemlestiriw usınısı da kórip shıǵıldı. Jańa struktura sharwalardıń máplerin qorǵaw, kooperaciyanı rawajlandırıw, násilshilik jumısları, ilimiy izertlew hám innovaciyalardı qollap-quwatlaw, finanslıq járdem kórsetiw hám sırtqı bazarlarǵa shıǵıwǵa járdemlesiw menen shuǵıllanadı.

Fermerler hám xalıq ushın “Smart Fermer” birden-bir sanlı járdemshisi de usınıldı. Mobil qosımsha arqalı sharwa malların identifikaciyalaw, veterinar shaqırıw, jasalma tuqımlandırıw, azıqlandırıw hám jaylawlardı basqarıw boyınsha maǵlıwmat alıw, subsidiyalarǵa múrájat etiw hám jasalma intellekt tiykarında másláhát alıw múmkin boladı.

Qusshılıq tarawında ulıwma bahası 432 million dollar bolǵan joybarlardı ámelge asırıw názerde tutılǵan. Bul joybarlar esabınan 2028-jılǵa shekem qosımsha 100 mıń tonna qus góshin islep shıǵarıw, azıq-awqat quwatlılıǵın 3,3 million tonnaǵa jetkeriw hám zamanagóy soyıw sistemasınıń qamtıp alıwın 20 procentten 50 procentke arttırıw maqset etilgen.

Mámleketimiz basshısı joybarlardıń ekonomikalıq nátiyjeliligin tereń tallaw, qarjılardı mánzilli baǵdarlaw, sanlı esap hám monitoringti jolǵa qoyıw, ishki bazardı sapalı hám arzan ónimler menen turaqlı támiyinlew boyınsha juwapkerlerge tapsırmalar berdi.