Transport tarawındaǵı iri investiciyalıq joybarlarınıń barısı kórip shıǵıldı

Transport infrastrukturası ekonomika tarmaqların óz-ara baylanıstırıwda, aymaqlardıń potencialın tolıq iske qosıwda, xalıq hám biznes ushın qolaylıq jaratıwda áhmiyetli orın iyeleydi. Sonlıqtan, mámleketimizde avtomobil jolları, aviaciya, logistika hám xalıqaralıq transport koridorların rawajlandırıwǵa ayrıqsha itibar qaratılmaqta.

Prezentaciyada, dáslep, “Tashkent – Samarqand” alternativ avtomobil jolın qurıw joybarı kórip shıǵıldı. Bul joldıń uzınlıǵı 282 kilometr bolıp, Tashkent, Sırdárya, Jizzaq hám Samarqand wálayatların baylanıstıradı. Jol I-a kategoriyada, cement-beton qaplamalı, hár eki jóneliste úshewden háreketleniw polosası menen qurıladı.

Joybarlanǵan tezlik saatına 150 kilometrdi quraydı.
Joybar sheńberinde 12 transport sheshimi, 60 tunnelli ótiw ornı, 91 kópir, 16 jol ótkel, 258 drenaj qurılması hám intellektuallıq transport sistemasın engiziw názerde tutılǵan. Sonday-aq, 12 terminal, jol boyı infrastrukturası hám salmaq ólshew sisteması shólkemlestiriledi.

Potenciallı investorlar menen sóylesiwler procesin jedellestiriw hám qurılıs jumısların qısqa múddetlerde baslaw tapsırıldı.
Elimizde aviaciya tarawında jańa ekosistemanı qáliplestiriw boyınsha keń kólemli jumıslar alıp barılmaqta.
Atap aytqanda, aymaqlardaǵı 7 xalıqaralıq aeroport zaman talapları tiykarında rekonstrukciyalanbaqta. Moynaq, Qoqand, Zomin, Shahrisabz, Sariosiyo, Súx rayonlarında jańa aeroportlar qurılıp, olardıń sanı 18 ge jetkerildi.

Atap aytqanda, Nawayı xalıqaralıq aeroportınıń jumısın joybarlaw basqarıw principleri tiykarında shólkemlestiriw, onıń kommerciyalıq erkinligin arttırıw jumısları alıp barılmaqta. Oǵan jergilikli hám sırt el aviakompaniyaları menen jolawshı hám júk tasıw, tranzit jáne texnikalıq qonıwlar boyınsha erkin sóylesiwler alıp barıw hám shártnamalar dúziw huqıqı berilgen.

2030-jılǵa barıp, aeroportta párwazlar sanın 2,3 esege arttırıp, jılına 7 mıńǵa, jolawshı tasıw kólemin 150 mıńǵa, júk tasıwdı bolsa 45 mıń tonnaǵa jetkeriw názerde tutılǵan. Sonday-aq, aeroport aymaǵında hawa kemelerine texnikalıq hám kommerciyalıq xızmetler kórsetiwge qánigelesken “porto-franko” erkin zonası shólkemlestiriledi.
Prezentaciyada Jańa Tashkent xalıqaralıq aeroportın qurıw joybarı kórip shıǵıldı.

Aeroport jılına 20 million jolawshıǵa xızmet kórsetiw quwatlılıǵına iye boladı. Jolawshı terminalınıń maydanı 208,4 mıń kvadrat metrdi qurap, 169 hawa kemesi turatuǵın orın, hár biri 4 kilometrden bolǵan 2 ushıw-qonıw jolı qurıladı.
Házirge shekem xalıqaralıq finans institutlarınıń talapları tiykarında ekologiyalıq hám sociallıq tásirdi bahalaw jumısları ótkerildi.

Joybar aymaǵında kanal, kollektor hám elektr tarmaqların kóshiriw jumısları baslanǵan. Házirgi waqıtta joybarlaw hám jumıstı bólip alıp islewshi shólkemler menen sóylesiwler alıp barılmaqta.
Puqaralıq aviaciya kárxanaların aviajanılǵı menen támiyinlew máselesi de kórip shıǵıldı.

Aeroportlardaǵı janılǵı quyıw kompleksleriniń ulıwma sıyımlılıǵı 49 mıń tonnanı quraydı. 2030-jılǵa shekem jergilikli aviajanılǵı islep shıǵarıw kólemin jılına 600 mıń tonnaǵa, aviajanılǵı saqlaw quwatlıqların bolsa 80 mıń tonnaǵa jetkeriw rejelestirilgen. Usı maqsette Nawayı, Ándijan, Buxara, Úrgensh hám Jańa Tashkent xalıqaralıq aeroportlarında jańa saqlaw quwatlıqları qurıladı.

Janılǵını saqlaw hám quyıw processlerin xalıqaralıq standartlarǵa basqıshpa-basqısh ótkeriw zárúr ekenligi atap ótildi. Janılǵı quyıw komplekslerin basqarıw processleri usı jılı tolıq sanlastırılatuǵını, aeroportlardıń janılǵı quyıw kompleksleriniń jumısında texnologiyalıq processler talaplarına ámel etiliwi ústinen sistemalı mámleketlik qadaǵalaw ornatılatuǵını belgilendi.

Mámleketimiz basshısı transport infrastrukturasın rawajlandırıwda joybarlardıń ekonomikalıq nátiyjeliligi, qurılıs sapası, qáwipsizlik talapları hám xalıq ushın qolaylılıq tiykarǵı ólshem bolıwı zárúrligin atap ótti hám tiyisli kórsetpeler berdi.