Mámleketlik xızmetlerdi kórsetiwde byurokratiyanı qısqartıw ilajları kórip shıǵıldı

Sońǵı jılları elimizde mámleketlik xızmetlerdi xalıq hám isbilermenler ushın qolaylı, jedel hám ashıq-aydın etiw boyınsha keń kólemli jumıslar ámelge asırıldı. Mámleketlik xızmetler kólemi 10 esege kóbeyip, 61 millionnan astı. Olardıń 80 procenti onlayn túrde kórsetilmekte. Tek ǵana 2025-jıldıń ózinde isbilermenlikke baylanıslı 2 mıńnan aslam májbúriy talap biykar etildi.

Sonıń menen birge, tarawda artıqsha tártip-qaǵıydalar, qaǵazpazlıq hám tákirarlanatuǵın talaplar elege shekem saqlanıp qalmaqta. Búgingi kúnde mámleketlik uyımlarda 5 mıń 650 funkciya, biznesti tártipke salıwshı 42 mıńnan aslam májbúriy talap hám 1 mıń 41 mámleketlik xızmet bar.

– Bunday kóp funkciya hám talaplar sistemanı nátiyjesiz, qımbat hám geyde ádalatsız etip qoyıwı múmkin. Sonıń ushın, tek deregulyaciya, sanlastırıw hám ápiwayılastırıw – eń durıs jol, – dedi mámleketimiz basshısı.

Ózbekstandı 2030-jılǵa shekem “Artıqsha byurokratiyadan jıraq aymaq”qa aylandırıw maqsetinde Birlesken Arab Ámirlikleri menen birgelikte “Byurokratiyanı saplastırıw – 2030” baǵdarlaması baslanǵan. Strategiyalıq rawajlanıw hám reformalar agentligi janında óz aldına joybarlaw ofisi shólkemlestirilgen.

Baǵdarlama sheńberinde mámleketlik uyımlardıń funkciyaların 30 procentke qısqartıw, bizneske qoyılatuǵın talaplardı 20 procentke shekem optimallastırıw, elektron mámleketlik xızmetlerdiń úlesin 90 procentten arttırıw názerde tutılǵan.

Prezentaciyada mámleketlik xızmetlerdi “servis mámleket” modeli tiykarında túp-tiykarınan jetilistiriw boyınsha usınıslar kórip shıǵıldı. Onda tiykarǵı itibar mámleketlik xızmetti birde-bir artıqsha hújjet talap etpey, tez, ashıq-aydın hám qolaylı kórsetiwge qaratıladı.

Atap aytqanda, 783 mámleketlik xızmetke “nol byurokratiya” principin engiziw usınıs etildi. Bul arqalı 550 túrdegi mámleketlik xızmet elektron túrge ótkerilip, xızmet kórsetiw basqıshları 2 esege qısqaradı. 80 túrdegi xızmet proaktiv hám kompozit túrge ótkeriledi. Nátiyjede xalıqtıń túrli uyımlarǵa keliwge jumsalatuǵın jılına 35 milliard sumǵa shekem transport qárejeti únemlenedi.

Jáne 80 túrdegi xızmetti kórsetiw múddeti 2-3 esege qısqartılıp, ortasha múddet 13 kúnnen 6 kúnge túsiriledi. 10 xızmet tolıq avtomatlastırıladı. 25 xızmet boyınsha tólemlerdiń azaytılıwı nátiyjesinde xalıqtıń ıqtıyarında jılına 851 milliard sumǵa shekem qarjı qaladı.

Sonday-aq, 10 xızmetti jeke menshik sektorǵa ótkeriw, 15 maǵlıwmat hám hújjetti sanlastırıw belgilenbekte. Bul arqalı 270 ten aslam xızmette usı maǵlıwmat hám hújjetlerdi qayta soraw ámeliyatı biykar etiledi.

Májbúriy talaplardı qayta kórip shıǵıw máselesine ayrıqsha itibar qaratıldı. Máselen, bazarlar jumısına baylanıslı 20 ǵa shamalas hújjette 500 den aslam talap pıtırańqı halda júrgizilmekte. Olardı sistemalastırıw arqalı talaplardıń 30 procentten aslamın optimallastırıw múmkin ekenligi atap ótildi.

Sanitariyalıq talaplarǵa muwapıqlıq aktin hám kórikten ótetuǵın xızmetkerlerdiń dizimin elektron sistema arqalı qáliplestiriw imkaniyatı da kórsetip ótildi. Bul arqalı jılına 1 milliard sum byudjet qarjısın únemlew, xızmetkerlerdiń 24 mıń jumıs saatın ámeliy jumısqa baǵdarlaw múmkin boladı.

Esap-sanaqlarǵa bola, hákimshilik júkti qısqartıw ekonomikaǵa jılına 1,5 milliard dollar tikkeley nátiyje beredi. Tártipke salıwdıń sapasın jaqsılaw qosımsha 800 million dollar sırt el investiciyasın tartıwǵa xızmet etedi. Mámleket hám biznes arasındaǵı processlerdi ápiwayılastırıw esabınan miynet ónimdarlıǵı jılına 750 million dollarǵa artadı. Ulıwma esapta byurokratiyanı qısqartıw ilajları 2026-2030-jıllarda ekonomikanı qosımsha 13 milliard dollarǵa ósiriw imkaniyatın beredi.

Prezentaciyada reestr.gov.uz birden-bir platforması arqalı mámleketlik funkciyalar, májbúriy talaplar hám mámleketlik xızmetler reestrlerin júrgiziw, uyımlardıń jumısın “Byurokratlıq radar” tiykarında bahalaw, jasalma intellekt arqalı tallaw hám “Biznes kalkulyator” arqalı isbilermenlerdiń qárejetin esaplaw sistemasın engiziw usınıs etildi.

Prezidentimiz mámleketlik xızmetler insan qádiri, isbilermenler ushın qolaylı ortalıq hám mámleketlik basqarıw nátiyjeliligi menen tikkeley baylanıslı ekenin atap ótti. Hár bir ministrlik hám uyım óz funkciyaların qayta kórip shıǵıwı, artıqsha talap hám hújjetlerdi biykar etiwi, xızmetlerdi sanlastırıwdı jedellestiriwi zárúr ekenligi atap ótildi.

Juwapkerlerge byurokratiyanı saplastırıw boyınsha qarar joybarın kirgiziw, onda hár bir ministrlik hám uyım kesiminde sanlastırıw, mámleketlik xızmetlerdi ápiwayılastırıw hám jeke menshik sektordıń úlesin arttırıw boyınsha anıq rejelerdi belgilew tapsırıldı.

Sonday-aq, tarawda aldıńǵı tájiriybelerdi ǵalaba en jaydırıw hám barlıq uyımlardıń jumısında “nol byurokratiya” principin izbe-iz engiziw boyınsha kórsetpeler berildi.